Stoltenberg: Anëtarësimi i Maqedonisë së Veriut në NATO, me rëndësi edhe për rajonin
Sekretari i Përgjithshëm i NATO-s, Jens Stoltenberg, po qëndron për vizitë në Maqedoninë e Veriut në krye të Këshillit Veri-Atlantik, në mbështetje të procesit të integrimit të vendit në NATO, raporton RFE.
Kreu i Aleancës fillimisht është pritur nga kryeministri i Maqedonisë së Veriut, Zoran Zaev i cili kryeson Komitetin për integrim në Aleancën e Veriut, që njëherësh shënon edhe mbledhjen e parë të Këshillit Veri-Atlantik me Komitetin për integrim, që kur Maqedonia e Veriut ka nënshkruar protokollin për anëtarësim në Aleancë.
Para fillimit të mbledhjes së përbashkët, Stoltenberg deklaroi se anëtarësimi i vendit në NATO është me rëndësi për vendin, por edhe për rajonin dhe tërë Aleancën. Ai tha se përfitimet e afrimit të vendit në NATO tashmë po ndjehen me rritjen e investimeve të jashtme.
Sekretari i Përgjithshëm i NATO-s, do të takohet edhe me presidentin e shtetit, Stevo Pendarovski, ku siç bëhet e ditur do të riafirmohet përkushtimi i Aleancës për rrumbullaksimin e procesit të anëtarësimit të Maqedonisë së Veriut në NATO.
Para së të arrij në Shkup, Stoltenberg, në një intervistë për agjencinë shtetërore të lajmeve MIA, ka theksuar edhe nevojën e përmbushjes së të gjitha kritereve që dalin si detyrim për vendet që do të jenë pjesë e Aleancës.
“Pres që të bisedojmë për integrimin e Maqedonisë së Veriut në NATO dhe punën që keni bërë në zbatimin e reformave kryesore si sundimin e së drejtës, sigurinë, sektorët e zbulimit dhe mbrojtjes. Me rendësi është që të vazhdoni me procesin e reformave, ndërsa ne do vazhdojnë të ju mbështesim në këtë rrugë”, ka deklaruar kreu i NATO-së, Jens Stoltenberg.
Në këto takime me drejtuesit e lartë shtetërorë veç tjerash diskutohet edhe për procesin e ratifikimit të marrëveshjes për anëtarësimin e Maqedonisë së Veriut në NATO. Nga 29 shtete anëtare të Aleancës, deri më tani protokollin për anëtarësimine kanë nënshkruar 13 shtete. Nga Qeveria kanë thënë se presin që ky dokument të nënshkruhet brenda një viti nga të gjitha shtetet, që përfundimisht Maqedonia e Veriut të bëhet anëtarja e 30-të e Aleancës.
Anëtarësimi i Maqedonisë së Veriut në NATO për shumë vite ishte bllokuar nga Greqia për shkak të moszgjidhjes së kontestit të emrit.
