Stoltenberg: FSK nuk mund të hyjë në veri pa lejen e NATO-s

Sekretari i Përgjithshëm i NATO-s, Jens Stoltenberg përsëriti se Forca e Sigurisë së Kosovës, FSK, nuk mund të hyjë në veriun e Kosovës pa pajtimin e NATO-s, duke vënë në dukje se ky është një detyrim ndërkombëtar i autoriteteve të Kosovës.

“Ne kemi një marrëveshje në Bruksel të vitit 2013 që e thotë qartë se FSK-ja nuk mund të shkojë në veri pa pëlqimin e komandantit të KFOR-it dhe ne presim që kjo marrëveshje të jetë ende e vlefshme,” theksoi Sekretari i Përgjithshëm i Aleancës, raporton RFE.

Stoltenberg pret që të gjithë të respektojnë këtë marrëveshje, për të cilën thuhet se është arritur përmes një këmbimi letrash më 2013 ndërmjet Sekretarit të atëhershëm të NATO-s, Anders Fogh Rasmussen dhe atëbotë kryeministrit të Kosovës, Hashim Thaçi.

Ai tha se të njëjtat qëndrime ia ka shprehur edhe kryeministrit të Kosovës, Ramush Haradinaj.

Ndryshe, një ditë më parë, kryeministri i Kosovës, Ramush Haradinaj, tha se Kosova i ka ofruar NATO-s një protokoll të ri të operimit për gjithë vendin pa dallim, nuk ka veri dhe jug. Ndërkohë theksoi edhe faktin se Parlamenti i Kosovës i ka dhënë mandatin Ushtrisë në gjithë vendin, pa dallim.