Stoltenberg: Muajt e ardhshëm do të jenë të vështirë për Ukrainën!

Ukraina përballet me muaj të vështirë përpara dhe kapaciteti ushtarak i Rusisë nuk duhet të nënvlerësohet, tha Sekretari i Përgjithshëm i NATO-s, Jens Stoltenberg.

Duke vlerësuar “guximin e jashtëzakonshëm” të forcave të Ukrainës, të cilat rikthyen kontrollin mbi rajonin e Hersonit, raporton RFE, ai tha se mbështetja ndërkombëtare për Kievin duhet të vazhdojë.

“Muajt e ardhshëm do të jenë të vështirë. Qëllim i presidentit rus, Vladimir Putin është ta lërë Ukrainën në të ftohtë dhe në terr këtë dimër,” tha Stoltenberg në një konferencë për media në Hagë duke shtuar:

“Ne nuk duhet të bëjmë gabim dhe ta nënvlerësojmë Rusinë,” tha ai, duke shtuar se forcat ruse kanë kapacitete të konsiderueshme, si dhe një numër të madh trupash.

“Tërheqja e Moskës nga Hersoni dëshmon guximin e jashtëzakonshëm të forcave të armatosura të Ukrainës, por tregon edhe mbështetjen tonë të vazhdueshme për Ukrainën,” tha Sekretari i Përgjithshëm i NATO-s.

Ushtria ruse mori kontrollin e Hersonit shumë shpejt pasi nisi pushtimin e Ukrainës, në fund të shkurtit.

Pas disa referendumeve të paligjshme që mbajti në shtator, Rusia e aneksoi atë, së bashku me tre rajone të tjera ukrainase.

Por, javëve të fundit, Ukraina shënoi fitore të mëdha në fushëbetejë, duke i vënë forcat ruse nën presion.

Ato u tërhoqën të premten nga Hersoni, ku më pas hynë trupat ukrainase.

Presidenti i Ukrainës, Volodymyr Zelensky, tha se hetuesit kanë zbuluar më shumë se 400 krime lufte në zonat e Hersonit, pas largimit të forcave ruse.

Stoltenberg tha se forcat ruse “kanë dëshmuar brutalitet ekstrem”.

“Keni parë skena të tmerrshme nga territoret e çliruara dhe sulme pa dallim ndaj civilëve dhe infrastrukturës kritike,” tha Stoltenberg pa u kuptuar nëse iu referua Hersonit në mënyrë specifike.