Studimi, gjatë pandemisë është rritur ankthi, në veçanti tek femrat

Pandemia e koronavirusit ka shkaktuar rritjen e rasteve të ankthit dhe çrregullimeve tjera të depresionit në gjithë botën, në veçanti tek femrat dhe rinjtë, ka treguar një studim i publikuar në revistën The Lancet.

Numri i rasteve të depresionit dhe ankthit, konstaton studimi, është rritur për më shumë se ¼ në botë në vitin 2020, për shkak të pandemisë.

Rritja e ankthit

Ky studim për herë të parë ka vlerësuar ndikimet globale të pandemisë në çrregullime të mëdha të depresionit dhe çrregullime ankthi, duke theksuar moshën, gjininë dhe vendin në 204 shtete dhe territore gjatë vitit 2020.

 Rezultatet tregojnë se gjatë vitit të kaluar rastet e çrregullimeve të mëdha të depresionit dhe ankthi janë rritur për 28 për qind përkatësisht 26 për qind.

“Kjo thekson nevojën urgjente të forcimit të sistemit shëndetësor,” tha autori i këtij studimi, Damien Santomauro nga Queensland Qendra për studimin e shëndetit mendor pranë School of Public Health në Australi, duke shtuar:

“Madje edhe para pandemisë, sistemet e mbrojtjes së shëndetit mendor në shumicën e vendeve nuk ishin të pajisura sa duhet dhe ishin të paorganizuara.”  

Femrat ishin më të goditura se sa meshkujt, e të rinjtë ishin më të goditur se sa grupmoshat e moshuara. Të rinjtë kanë vuajtur sepse mbyllja e shkollave i ka mbajtur larg miqve të tyre, e shumë gra janë përballur me rrezikun e shtuar nga dhuna në familje, theksojnë studiuesit.

“Gratë do të goditen më shumë”

Studimi i cili u drejtua nga akademikët e Universitetit Queensland në Australi, ka shënuar 76 milionë raste të çrregullimeve të ankthit shtesë dhe 53 milionë të çrregullimeve të rënda të depresionit me përhapjen e koronavirusit në vitin 2020.

“Për fat të keq, nga shkaqe të shumta, gratë kishin gjithmonë mundësinë më të madhe të goditen me pasojat shoqërore dhe ekonomike nga pandemia,” tha bashkëautorja e studimit, Alize Ferrari duke shtuar:

“Shqetësimet shtesë dhe përgjegjësia në familje zakonisht bien mbi gratë, dhe ekziston mundësia që gratë do të jenë viktimë e dhunës në familje, e cila është rritur në faza të ndryshme të pandemisë. Mbyllja e shkollave dhe ndalesat tjera e kufizojnë aftësinë e të rinjve që të mësojnë dhe komunikojnë me moshatarët e tyre, e kombinuar kjo me rrezikun e shtuar nga papunësia gjithashtu kanë kontribuar në ngarkesën edhe më të madhe të shëndetit mendor  tek të rinjtë.”   

Studimi ka përfshirë 48 studimet paraprake nga e gjithë bota, e rezultatet e veta i ka bashkuar në meta-analizë në mënyrë që të rritet prevalenca e çrregullimeve të shëndetit mendor në 204 shtete dhe territore për vitin 2020.

Vlerësohte se është shënuar rritje prej 28 për qind e rasteve të çrregullimeve të mëdha të depresionit, në 246 milionë raste, në krahasim me 193 milion rasteve të vlerësuara para se ndodhte pandemia. Autorët e studimit tërheqin vërejtjen se ekziston një mangësi e të dhënave cilësore për ndikimin e pandemisë në shëndetin mendor në shumë vende të varfra.