Studimi i ASH për COVID-19: Niveli i imunitetit në Shqipëri 25%, në Tiranë 50%

Niveli i imunitetit dhe i kontaktit me koronavirusin në Shqipëri është 25% ndërsa në Tiranë është 50%. Këtë e konfirmon studimi seroepidemiologjik mbi gjendjen e imunitetit të popullsisë në situatën e pandemisë së shkaktuar nga COVID-19, sipas të dhënave prej depistimit, fazëne dytë të të cilin e prezantoi sot Akademia e Shkencave e Shqipërisë, ASHSH.

Rezultatet e studimit, që i përkasin periudhës nga qershori deri në muajin dhjetor, u paraqitën nga akademiku Genc Sulçebe dhe prof. Alban Ylli, të cilët theksuar se imuniteti tregohet referuar antitrupave të krijuara nga qytetarët, shumica asimptomatikë.

“Në Shqipëri niveli i imunitetit dhe i kontaktit me virusin duket se është 25%. Imuniteti është ende i ulët përvec Tiranës ku presim valë më të ulta. Në Tiranë imuniteti ëhstë 50%, por ende popullata e pergjitshme ka potencial te qarkulloje virusin. Është lajm i mirë imunizimi në kryeqytet, por nuk ka arsye të festojmë,” tha profesor Ylli.

Kujtojmë se, Akademia e Shkencave ka ndjekur në vazhdimësi nivelin e imunitetit të fituar në popullatë ndaj Sars Cov-2, nëpërmjet testimeve serologjike të realizuara nga specialistёt imunologë, pjesë e shërbimit të imunologjisë pranë QSUT, anëtarë e bashkëpunëtorë të Akademisë.

Akademia e Shkencave, nëpërmjet E-grupit “Në ndjekje të pandemisë”, komisionit të mjekësisë e njësive pranë saj, kreu një studim paraprak për reagimin e imunitetit dhe të fituarit e autoimunitetit në muajt maj-korrik 2020. Në atë fazë u dëshmua se numri i të infektuarve ishte 6-7 për qind, disa herë më lart se numri i të prekurve përmes diagnostikimit me tampon.