Studimi i OBSH/ Edi Rama gënjeu, Basha: Shëndetësia dhe ekonomia janë në kolaps

Pas publikimit të studimit të fundit nga Organizata Botërore e Shëndetësisë, ku rezulton se 8% e familjeve shqiptare ranë në varfëri prej shpenzimeve të larta shëndetësore, ka reaguar Kryetari i Partisë Demokratike, Lulzim Basha, duke theksuar se Edi Rama i cili premtoi shëndetësi falas gënjeu, dhe sot si shëndetësia ashtu dhe ekonomia janë në kolaps.

“Rama premtoi shëndetësi falas për shqiptarët. Ai gënjeu. OBSH raporton se 8% e familjeve shqiptare ranë në varfëri prej shpenzimeve të larta shëndetësore. Rama e ka humbur kontrollin mbi pandeminë. Shëndetësia dhe ekonomia janë në kolaps,” shprehet Lulzim Basha në reagimin e tij përmes rrjetit social Twitter duke përfunduar:

“Së bashku do ta mundim këtë të keqe, do ta shërojmë Shqipërinë dhe do të sjellim shpresën dhe të ardhmen që dëshiron çdo shqiptar.”

Ndryshe, rreth 8% e familjeve janë futur në varfëri ose varfërohen më tej, pasi paguajnë nga xhepi për shërbime shëndetësore dhe 12% e familjeve përjetojnë shpenzime katastrofike shëndetësore, thotë studimi i publikuar së fundmi nga Organizata Botërore e Shëndetësisë, OBSH. Shpenzimet me para në dorë për shërbimet shëndetësore konsiderohen katastofike nga OBSH, pasi ato bëhen shkak për të lënë të pambuluara nevojat bazë të jetesës.