Stuhi tjetër vdekjeprurëse në Serbi, humbi jetën një fëmijë dhe një grua

Një djalë 12-vjeçar dhe një grua kanë humbur jetën në Serbi gjatë një stuhie tjetër vdekjeprurëse, e cila goditi Ballkanin, kanë bërë të ditur sot mediat lokale.

Stuhia e së premtes fillimisht goditi Slloveninë, duke vazhduar drejt Kroacisë, e më pas drejt Bosnjes dhe Serbisë, raporton RFE, ku solli erëra të fuqishme dhe shira të rrëmbyeshëm.

Autoritetet raportuan probleme me furnizimin me energji elektrike dhe dëme të mëdha, përfshirë pemë të shkulura, të cilat dëmtuan automjete dhe çati shtëpish, raporton AP.

Të mërkurën, një stuhi tjetër vrau gjashtë persona në rajon – katër prej të cilëve në Kroaci, një në Slloveni dhe një në Bosnje.

Meteorologët kanë thënë se stuhitë ishin aq të fuqishme, sepse pasuan disa ditë jashtëzakonisht të nxehta. Ekspertët thonë se kushtet e motit ekstrem me gjasë janë nxitur nga ndryshimet klimatike.

Në qytetin verior serb të Novi Sadit, djali 12-vjeçar u gjet i vdekur në rrugë gjatë stuhisë, por mbetet e paqartë nëse ai ishte goditur nga rrufeja apo është vrarë nga rryma, ka njoftuar televizioni shtetëror RTS.

Mediat lokale thonë se Novi Sadi është goditur më së ashpri, ku stuhia ka dëmtuar çatinë e një qendre ekspozitash në qytet. Rreth 30 persona kanë kërkuar ndihmë mjekësore, ndërsa shumë rrugë kanë mbetur të bllokuar në mëngjesin e 22 korrikut.

Në fshatin Kovaçica, në verilindje të Serbisë, një grua vdiq nga tymi, pas shpërthimit të një zjarri, kur rrufeja goditi një pemë pranë shtëpisë së saj, ka bërë të ditur RTS.

Policia serbe ende nuk ka lëshuar një njoftim zyrtar për shkallën e dëmeve të shkaktuara nga stuhia.

Ndryshe, raporton RFE, në Evropë, një valë e vazhdueshme e të nxehtit ekstrem ka shkaktuar zjarre të egra dhe ka nxitur paralajmërime për shëndetin./RFE/