Suedi, frikë nga aktet tjera terroriste! Säpo ngrit nivelin e sigurisë
Para stadiumit kombëtar të Suedisë, dy fanella në kornizë të kombëtares së futbollit qëndrojnë pranë flamurit të lëshuar në gjysmështizë, në kujtim të dy tifozëve të vrarë të hënën nga një terrorist në Bruxelles dhe për të rikujtuar kalimtarëve që të jenë të kujdesshëm për shkak të sulmeve tjera eventuale, raporton Politico.
“Shpresojmë të jetë kjo hera e fundit që ndodhë diçka e tillë, por vazhdimisht e kthejë kokën mbrapa të shikoj se çfarë ka,” tha Kent Åberg, 62 vjeç, punëtor i aeroportit i cili kishte ardhë të nderoj viktimat.
Në Stockholm situata është e tensionuar pas këtij rasti në Bruxelles ku luhej përballja e dy kombëtareve të futbollit Bruksel-Suedi, kur autori i aktit, azilkërkuesi nga Tunisia kishte shkruar në rrjetet sociale se kishte shënjestruar suedezët për “t’u hakmarr në emër të myslimanëve”.
Ky sulm erdhi pas muajve të tërë të rritjes së tërbimit ndaj Suedisë pasi ekstremisti suedez, Rasmus Paludan, i vuri flakën disa kopjeve të Kur’anit. Gjatë vitit, po të njëjtin akt e kishte kryer edhe protestuesi irakenë, Salwan Momika. Njëkohësisht fushata online e dezinformimit që fliste për rrëmbimin e fëmijve myslimanë nga autoritetet suedeze, rrënoi reputacionin e Suedisë ndër myslimanë.
“Ne jemi në krye të listës sa i përket shteteve perëndimore që konsiderohen se bëjnë luftë kundër islamit dhe që janë identifikuar si shënjestra prioritare. Organizatat terroriste përqëndrohen te Suedia, para së gjithash ISIS dhe Al Qaeda, dhe nxisin mbështetësit që ta sulmojnë Suedinë dhe interesat suedeze jashtë shtetit, duke theksuar vendet publike si shënjestra prioritare, duke përfshirë këtu dhe stadiumet dhe koncertet,” tha për radion kombëtare, studiuesi i terrorizmit në Universitetin suedez të Mbrojtjes, Magnus Ranstorp.
Aktualisht në qendër të Stockholmit shihet një prezencë më e madhe policore rreth parlamentit dhe institucioneve tjera të rëndësishme duke përfshirë dhe pallatin mbretëror.
Në muajin gusht, pas rasteve më të reja të djegies së Kur’anit, shërbimi suedez i sigurisë “Säpo” e ngriti nivelin e sigurisë nga 3 në 4 nga 5 nivele sa janë gjithsejë, duke besuar se Suedia tashmë është shënejstër “prioritare” e terroristëve islamik, dhe jo më vetëm “legjitime”.
Partia më e madhe opozitare, Socialdemokratët, angazhohen për ndalimin me ligj të djegies së Kur’anit duke e konsideruar si shprehje të urrejtjes, ndërsa partia më e madhe qeverisëse, partia e Kristerssonit, mbështet ndryshimet në ligj që rregullojnë të drejtën e protestës. Sfidë për Kristerssonit dhe qeverinë e tij ngelet mbrojtja e suedezëve njëkohësisht duke mos lëshuar pe para terroristëve ose kufizimit të mënyrës së jetesës së qytetarëve.
