Sulltan Nevruzi, Berisha: Le të urojmë që vitin e ardhshëm të festojmë pa diktaturën aktuale!

Bashkëbisedimin me qytetarët në rrjetet sociale, sot Kryetari i Partisë Demokratike, Sali Berisha, e nisi me urimin për këtë ditë bekuar ndërsa ju përgjigj pyetjeve për çmimin e naftës, çmimin e energjisë me të cilin ka abuzuar aq shumë Qeveria Rama, minimumin jetik, pronat e bregut që i ka grabitur mafia, si dhe zonat e lira kufitare me Kosovën!

“Dua të uroj shqiptarët për këtë ditë të bekuar, 22 marsin, në të cilin ata me votën e lirë u ndanë nga diktatura më e keqe staliniste në Europë dhe nisën rrugën e demokracisë.

Le të urojmë së bashku që këtë ditë vitin e ardhshëm të festojmë pa diktaturën aktuale, por me triumfin e demokracisë dhe shpëtimin e Shqipërisë.
Gëzuar!” tha Sali Berisha duke vazhduar me pyetjet e qytetarëve që filluan me çmimin e naftës dhe zotimin e tij se ajo në Shqipëri nuk do shitet mbi çmimin që shitet në Kosovë dhe Maqedoni.

“Rama nuk e bën këtë sepse Rama ka një koncept të veçantë. Para se të vija këtu po e dëgjoja në një video që i thoshte një pensionisti se ç’punë ka pensionisti me naftën.
Pra, edhe naftën e konsideron si një privilegj të atyre që kanë, në një kohë kur nafta është energji dhe është e domosdoshme për të gjithë shqiptarët. Ne do ta bëjmë këtë, nafta në Shqipëri nuk do shitet mbi çmimin që shitet në Kosovë dhe Maqedoni.
Kosova e merr nga Durrësi naftën. Nuk mund të taksohet nafta 1.1 euro. Që këtu është një ndëshkim për qytetarët,” tha lideri i opozitës duke sqaruar dhe premtimin për minimumin jetik që, sipas tij, asnjë shqiptar që mos marrë më pak se 200 euro në muaj dhe ky është vetëm fillimi.

“Edi, u garantoj që është një premtim, për të cilin kurrë nuk do të më shkonte ndërmend ta përdor për qëllime elektorale.
Jo, është një premtim që buron nga thellësitë e shpirtit kur shoh gjendjen e mjerë të shqiptarëve, të pensionistëve shqiptare që merrnin në vitin 2013 pensione të ulëta, por ishin më të lartat në rajon.
Dhe sot malazezi merr një pension 3 herë më të lartë se në vitin 2013, serbi dhe maqedonasi po njëlloj.
Po edhe Kosova që ka nisur rrugën e pavarësisë pak vite më parë, shpërblen qytetarët e vet me pensione qartësisht më të larta se Shqipëria.
Jo, do vendoset minimumi jetik që asnjë shqiptar që mos marrë më pak se 200 euro në muaj dhe ky është vetëm fillimi. Ky është vetëm fillimi,” tha Berisha duke folur dhe për çmimin e energjisë elektrike ku u zotua.

“Energjia do zbresë nga 18 dhe 24 lekë që blihet sot, do zbresë në 6 lekë.
Gjer në vitin 2013, energjia është shitur me 67 lekë. Tani energjia do jetë fiks 6 lekë për çdo biznes.
Së dyti, pa diskutim që do lihen 5 vjet pa taksa dhe natyrisht do paguajnë sigurime shoqërore, por edhe aty do shohim për lehtësira.
Kurse asnjë taksë tjetër gjersa të ngrihet në këmbë dhe të bëhet i suksesshëm biznesi i tyre.
Impakti në biznes? Asnjë impakt negativ sepse këto janë investime të cilat pas 5 vitesh fillojnë dhe japin.”

Duke i dhënë të drejtë qytetarit i cili thotë se tokat e bregut i grabiti mafia, Kryedemokrati u zotua se ato do i kthehen banorëve.

“Tokat i mori Rilindja, të themi të vërtetën, sepse ai ish-kryetari i mëparshëm, Vasil Bollano, u tregua një njeri i ndershëm dhe me gjithë hetimet, nuk patën ku të gjejnë qoftë një shkelje të vetme.
Për të grabitur tokat, burgosi në mesnatë me akuza dhe dëshmitarë false, Fredi Belerin sepse ai nuk do pranonte t’ia dorëzonte Edi Ramës dhe mafies së tij shtetërore tokat.
Tani mësohet se Edi Rama, me vëllain e tij dhe Nushët kanë marrë një sipërfaqe prej 224 mijë metra tokë që nuk u takonte kurrë për të cilin nuk kanë asnjë dokument kadastral.
Dhe garantoj se do u merret.
10 mijë metra katrorë ka marrë ish-ministrja grabitqare Olta Xhaçka. Kur unë e denoncoja në parlament, ajo mashtronte e thoshte e ka tokë të familjarëve të vet. Ajo nuk kishte asnjë metër tokë aty.
Pra, është e vërtetë ajo që thoni ju, tokat e bregut i grabiti dhe po i plaçkit mafia, ne do ia nxjerrim nga kthetrat mafies dhe do ia kthejmë banorëve të vet,” tha Berisha duke premtuar mbështetje financiare për investime, strehim dhe garanci për punësimin e rinisë që rikthehet në Shqipëri.

“Largimi i trurit, hemoragjia rinore, janë fenomenet më të rënda, plagët më të rënda të këtij vendi. Ne do të bëjmë gjithçka nëpërmjet ‘brain gain’ dhe programeve të veçanta për të rinjtë që Shqipëria të bëhet vendi i ëndërrës së tyre, ëndërrës së ditë së tyre.
Për të rinjtë së pari në heqim mesataren dhe i krijojmë mundësitë secilit të provojë fuqitë dhe aftësisë e tij në univeristet.
Së dyti, do të bëjmë gjithçka për punësimin e të rinjve, duke përdorur stimuj dhe incentivë për të gjithë ata që punësojnë të rinj, duke paguar sigurimet shoqërore për një kohë 1 deri në 5 vjeçare sipas sektorit. Duke financuar me grante start upet e tyre, duke kredituar me kredi të buta strehimi dhe çdo çifti të ri.
Pra, Shqipëria që sot është një vend ku të rinjtë nuk imagjinojnë se mund të ndërtojnë ëndërrën e tij, ëndërrën shqiptare, projektin e tyre, ne do ta bëjmë një vend plotësisht të jetueshëm dhe të besueshëm për ëndërrën shqiptare.
Nga ana tjetër ne do të rikthejmë, kemi aktualisht një departament ‘Brain Gain’ me djem e vajza të shkëlqyer të një ekspertize të lartë, dhe jemi në komunukim të vazhdueshëm me to.
Kjo do të zgjerohet për një zbritej të tyre të butë në Shqipëri, për një mbështetje financiare për investime, me një mbështetje financiare për strehimin e tyre, me garancira për punësimin e tyre dhe unë jam optimist.
Pse jam optimist? Sepse në vitin 2005 kur erdhëm në pushtet, në administratën e shtetit shqiptar kishte gjithsej 1.5% punonjës të shkolluar jashtë shtetit. Kur e dorëzuam e kemi dorëzuar me 22% punonjës të shkolluar jashtë shtetit.
Dhe pa llogaritur qindra të tjerë që u kthyen në jetën e tyre private. Rikthimi i të rinjve dhe shqiptarëve nga jashtë vendi në Shqipëri është kusht themelor për ‘Shqipërinë Madhështore’ dhe ne jemi të bindur se ne do e realizojmë këtë duke lehtësuar 5 vite pa asnjë taksë të gjithë shqiptarët jashtë vendit që do vijnë të investojnë në vendin e tyre dhe me favorizime të tjera,” tha Berisha duke i bërë thirrje emigrantëve që u bllokuan nga sistemi, të vijnë e të votojnë direkt si një kontribut historik për vendin.

“Vota do të lexohet drejt, sepse aty kemi përfaqësuesit tanë.
Por ftoj çdo emigrant që u bllokua nga sistemi të bëjë çdo përpjekje për të ardhur dhe votuar direkt në Shqipëri si një kontribut historik për vendin dhe kombin e tij.”

Në fund, Kryetari i Partisë Demokratike u zotua se me qeverinë e Kosovës do të krijohen zona të lira kufitare ndërsa bëri dhe betimin solemn se PD do u rikthejë shqiptarëve paratë e vjedhura me inceneratorin që nuk ekziston.

“Së pari, për zonat verilindore do ketë plan ekonomik për shfrytëzimin racional të të gjitha potencialeve dhe burimeve të tyre, ku duhet të përfitojnë banorët e këtyre zonave.
Së dyti, do bëjmë gjithçka që me qeverinë e Kosovës të krijojmë zona të lira kufitare.
Së treti, do bëjmë gjithçka që të subvencionojmë, të mbështesim investimet me lehtësime taksash.
Unë u them ju, se ligji i vitit 2013 parashikonte 8 vite pa taksa për investimet në zonat malore dhe atë ligj e anuloi Edi Rama dhe tani e riktheu me Paketën e Maleve për t’u dhënë trafikantëve të tij atë që nuk e meritojnë,” tha Kryetari i Partisë Demokratike, Sali Berisha, në bashkëbisedimin e sotëm me qytetarët në rrjetet sociale duke përfunduar:

“Faleminderit shumë dhe njëherë, nga zemra ju uroj gëzuar këtë ditë të bekuar dhe ju ftoj që me këtë program të ndërmarrim një bisedë, një dialog, një debat me njëri-tjetrin dhe me çdo qytetar shqiptar, për të bindur se PD ka ndërmend të rikthejë, tu japë paratë shqiptarëve.
Tu kthejë shqiptarëve paratë që vidhen në mënyrë të paimagjinueshme në rrugë dhe vepra publike. Paratë që mungojnë, që janë marrë për inceneratorin që nuk ekziston, me udhëtimet me 21 mln euro të kreut të qeverisë, me drekat dhe darkat me shishe 33 mijë euro, që kushtojnë dhjetëra e dhjetëra pensione, me kopështin e Edenit sa 30 mijë pensione në oborrin e qeverisë.
Pra, pavarësisht cilido që mund të jetë i dëshpëruar dhe i zhgënjyer, të mbledhë forca dhe kurajo, të ndahemi nga kjo e keqe për një udhëtim krejt tjetër, drejt Shqipërisë Madhështore, Shqipërisë së ëndërrës shqiptare. Faleminderit!”