Sulm taliban, humb jetën një ushtar kroat në Kabul

Pas një sulmi me motoçiklist vetëvrasës në Kabul, janë plagosur tre ushtarë kroatë njëri prej të cilëve, 27 vjeçari Josip Brishki, nuk i mbijetoi plagëve.

Sulmi ka ndodhur pasi ushtarët kroatë rreth orës 08:00 të mëngjesit janë nisur nga kampi Gibson, i cili është në kuadër të aeroportit Kaja në Kabul, me pesë mjete të blinduara joluftarake. Në çdo mjet kishte nga tre ushtarë, në tri prej tyre kishte ushtarët kroatë ndërsa në dy të tjerat ishin ushtarët afganë.

Në momentin kur po lëviznin drejtë kampit Lion, në mjetin e tretë që po lëvizte është përplasur një motoçikletë e cila drejtohej nga një kamikaz. Pas sulmit, përgjegjësinë e morën talibanët.

Ushtari Josip Brishki, 27 vjeç, ishte pjesëtar i Forcave speciale të Ushtrisë së Kroacisë i cili në Afganistan ishte angazhuar si këshilltar i Forcave afgane të sigurisë. Me vite të tëra është pjesë e forcave kroate ndërsa ky ishte misioni i parë në Afganistan.

Josip Brishki ishte baba i një djali një vjeç dhe së bashku me bashkëshorten jetonin në Sesveta.

Pas vdekjes së ushtarit Josip Brishki, telegrame ngushëllimi familjes i dërguan Presidentja Kolinda Grabar Kitaroviç, Kryeministri Andrej Plenkoviç dhe ministri i Mbrojtjes i Kroacisë, Damir Krstiçeviç.