Sulmet vazhdojnë, Rama: Ilir Meta, kandidat i LSI me subjektet e OFL, Meta: Në Vlorë nuk bëhet shaka!
Ndonëse një lajm i mirë i vjen nga Kosova ku shumë qytetarë janë dyndur drejt bregdetit shqiptar për të kaluar fundjavën, nga bregdeti edhe sot kanë vazhduar sulmet e dyshes që ka kriminalizuar dhe shkatërruar Shqipërinë, Ilir Meta dhe Edi Rama. Deri sa Kryeministri Edi Rama tha se Ilir Meta si kandidat i LSI po bënë fushatë skutave të Vlorës me subjektet e OFL, shoqëruar me gjyqtarë dhe prokurorë të nxjerrë jashtë nga procesi i Vettingu, Meta nuk vonon dhe nga Fieri i kthen përgjigje duke e akuzuar si kuisling që po përdoret nga armiqtë e Shqipërisë.
“Presidenti, ose më saktë, Ilir Meta, tani është kandidat zyrtar i partisë së tij në Vlorë. Ai bën një fushatë skutave, me subjekte të OFL, i shoqëruar me gjykatës e prokurorë të nxjerrë jashtë nga Vettingu dhe ëndërrojnë revanshin përmes Saliut dhe Ilirit, që qëllimin kryesor kanë rimarrjen në duar të drejtësisë dhe rizhytjen e drejtësisë në llumin e të shkuarës,” tha Edi Rama duke vazhduar sulmet edhe për dekorata:
“Shpërndan dekorata, tani lajmi i fundit është se do të dekorojë edhe floktore në Vlorë, nuk e di kujt do t’i bjerë. Nëse parukierja jote nuk dekorohet sot, thuaji nga ana ime të mos mërzitet. Presidenti ofron edhe nxjerrjen nga burgu të vëllait të X-it, apo të kunatit të Y-nit, një tërësi gjërash që do të jenë të mjaftueshme për vlonjatët për t’ia dhënë dërrmën këtyre forcave krejt të kundërta me historinë që po bëjmë ne dhe që më 25 prill të vazhdojmë punën.”
Presidenti Ilir Meta iu përgjigj me të njejtën gjuhë vëllaut të tij komunist Kryeministrit Edi Rama se duhet ta kuptojë se në Vlorë nuk bëhet shaka ndërsa e akuzoi si kuisling që po përdoret nga armiqtë e Shqipërisë.
“Të jetë i qetë edhe kryeministri, edhe Tërmet, deri më 26 prill do të jem në Vlorë, ditën edhe natën. Duhet ta kenë të qartë se cdo skenar i ndodhur në Vlorë do të jetë i papranueshëm. Duhet të kuptojnë se në Vlorë nuk bëhet shaka. Ilir Meta do të bëjë gjithçka për të garantuar zgjedhje të lira e të ndershme. Ai po përdor gjithë pushtetin për të blerë, shantazhuar. Shpesh ka pasur sukses në këtë rrugën e tij, por pengesa ka qenë Ilir Meta. Kjo është një betejë finale për 100 vitet që vijnë. Nuk është një betejë mes Ilir Metës dhe Edi Ramës. Edi Rama kuisling që po përdoret nga armiqtë e Shqipërisë, duke tentuar të nxjerrë në shitje edhe atë që ka ngelur, dhe të zëvendësojë vlonjatët e shqiptarët me bangladeshas”, tha Meta duke garantuar Ramën se në 25 prill kushdo mund të bëhet kurban, por demokracia kurrë jo.
“Së pari ka patur vaksina plot nëpër depo, kjo është një shpikje, ai nuk ka këtë shqetësim, cështjen mund ta kishte zgjidhur prej muajsh. Edhe lajmet për marrjen nga ushtria të kullës e bëri jo vetëm për të frikësuar qytetarët. Ta ketë të qartë se ai është mësuar të korruptojë edhe burra që turpërojnë edhe fjalën prostitutë, që edhe ato nga halli e pamundësitë bëjnë ndonjëherë diçka që kurrë nuk do të donin ta bënin në jetën e tyre. Burra me vese që turpërojnë familjet e tyre, fëmijët e tyre, vendin e tyre por duhet ta dinë që në 25 prill do marr përgjigjen nga vajzat e Vlorës, Fierit, Durrësit, Tiranës e gjithë Shqipërisë e mbi të gjitha nga nënat shqiptare që nuk duan më të jetojnë në shtëpitë e tyre të zbrazura nga fëmijët,” tha Presidenti Ilir Meta duke përfunduar:
“Do marrë përgjigjen në mënyrë më demokratike dhe më civile më 25 prill nga populli shqiptar. Një gjë është e sigurtë më 25 prill kushdo mund të bëhet kurban por demokracia kurrë nuk mund të bëhet kurban.”
