Sulmi me armë ndaj Top Channel, reagojnë krerët e shtetit

Pas ngjarjes së rëndë në orët e para të ditës së sotme ku u qëllua me armë zjarri godina e televizionit Top Channel, me ç’rast humbi jetën roja në detyrë, kanë reaguar Presidenti i Republikës, Bajram Begaj, Kryeministri Edi Rama, dhe lideri i opozitës Sali Berisha, duke e konsideruar si akt të rëndë kriminal ndërsa inkurajojnë organet ligjzbatuese të zbardhin rastin.

“Ngjarje vërtet e rëndë ajo e orëve të para të mëngjesit, ku godina e televizionit kombëtar “Top Channel” është qëlluar me armë, e ku për pasojë ka humbur jetën roja i sigurisë Pal Kola. Teksa i shpreh ngushëllimet e mia familjes së z. Kola, inkurajoj organet ligjzbatuese ta zbardhin sa më shpejt dhe me përgjegjshmërinë më të lartë këtë ngjarje kriminale,” shprehet Barjam Begaj.

Kryeministri Edi Rama duke i shprehur ngushëllimet e familjes së të ndjerit i cili humbi jetën pas disa të shtënave me armë zjarri, thekson se agresioni kriminal ndaj Top Channel kërkon përgjigje të qartë nga agjencitë ligjzbatuese.

“Agresioni kriminal ndaj TCH me pasojë edhe një humbje jete të personelit të sigurisë, kërkon përgjigje të qartë nga agjencitë ligjzbatuese! Ngushëllime familjes së të ndjerit dhe krejt bashkësisë së TCH, e cila meriton solidaritetin e të gjithëve në këtë moment kaq shqetësues,” shprehet Edi Rama në reagimin e tij përmes rrjetit social Twitter.

Sulmin ndaj Top Channel e ka dënuar edhe lideri i opozitës, Sali Berisha, duke e cilësuar si akt të shëmtuar kriminal.

“Një akt kriminal i shëmtuar. Sulmohet me armë zjarri Top Channel dhe ekzekutohet në kabinën e tij roja e objektit. Dënoj me ashpërsinë më të madhe këtë akt të shëmtuar kriminal dhe i shpreh ngushëllimet e mia më të ndjera familjes së viktimës, miqve, të afërmve dhe kolektivit të Top Channel,” thekson Kryetari i PD, Sali Berisha, në reagimin e tij përmes rrjetit social Facebook duke përfunduar:

“Denoncoj këtë akt kriminal, si dëshmi tjetër e dhimbshme e pasigurisë së plotë, që ekziston sot në vend nga vendosja e rendit nga regjimi në duart e krimit.” 

Ndryshe, në orët e para të ditës së sotme, ku është qëlluar me armë zjarri në drejtim të godinës së Top Channel, humbi jetën Pal Kola.

Ndërkohë autostradën e Kavajës, tek vendi i quajtur “Përroi i Agait” është gjetur një mjet i djegur tip “Range Rover”, i cili dyshohet se u përket autorëve. Sipas informacioneve, targat e mjetit rezultojnë të vjedhura.

Policia është në vendngjarje, ndërsa grupi hetimor vijon punën  për zbardhjen e rrethanave.