Sulmi ndaj Iranit, deklaratë Gjermania, Franca dhe Britania: Irani të gjejë një zgjidhje të negociuar!

Pas sulmit të Shteteve të Bashkuara dhe Izraelit kundër Iranit, dhe përgjigjes së kësaj të fundit ndaj Izraelit si dhe goditjeve në shenjë hakmarrje të bazave ushtarake amerikane në Bahrein, Kuvajt, Jordani, Emiratet e Bashkuara Arabe dhe Katar, kancelari gjerman Friedrich Merz, presidenti francez Emmanuel Macron dhe Kryeministri britanik Keir Starmer, kanë bërë thirrje përmes një deklarate të përbashkët për stabilitet rajonal dhe kanë dënuar sulmet e Iranit në Lindjen e Mesme.

Udhëheqësit e Gjermanisë, Francës dhe Mbretërisë së Bashkuar theksojnë se ata nuk kanë marrë pjesë në sulme, por shtojnë se janë në kontakt të ngushtë me partnerët ndërkombëtarë.

Tre liderët vënë theksin gjithashtu te rëndësia e dhënies fund të programit bërthamor të Iranit, duke shtuar se regjimi i Khameneit duhet të gjejë një zgjidhje të negociuar.

Deklarata:

Franca, Gjermania dhe Mbretëria e Bashkuar i kanë kërkuar vazhdimisht regjimit iranian që t’i japë fund programit bërthamor të Iranit, të frenojë programin e tij të raketave balistike, të përmbahet nga aktiviteti i tij destabilizues në rajon dhe në vendet tona, si dhe të ndërpresë dhunën dhe represionin e tmerrshëm kundër popullit të vet.

Ne nuk morëm pjesë në këto sulme, por jemi në kontakt të ngushtë me partnerët tanë ndërkombëtarë, përfshirë Shtetet e Bashkuara, Izraelin dhe partnerët në rajon.

Ne përsërisim angazhimin tonë për stabilitetin rajonal dhe për mbrojtjen e jetës civile.

Ne i dënojmë sulmet iraniane ndaj vendeve në rajon me fjalët më të ashpra. Irani duhet të përmbahet nga sulmet ushtarake pa dallim.

Ne i bëjmë thirrje udhëheqjes iraniane të kërkojë një zgjidhje të negociuar.

Në fund të fundit, popullit iranian duhet t’i lejohet të përcaktojë të ardhmen e tij.