Sulmi ndaj zyrave të KKZ në Mitrovicë të Veriut, tre terroristët serbë dënohen 12 vjet burg 

Gjykata Themelore në Prishtinë ka shpallur aktgjykimin për rastin e sulmit terrorist ndaj zyrave të Komisionit Komunal Zgjedhor, KKZ, në Mitrovicën e Veriut, në dhjetor të vitit 2022. 

Kështu: Milun Milenkoviç e Aleksandar Vlajiç u dënuan me nga 5 vjet burg, kurse Dejan Pantiç me 2 vjet, ndërkohë Miomir Vakiç, është liruar nga akuzat.

Të akuzuarit Milun Milenkoviç dhe Aleksandar Vlajiç, kanë kërkuar nga trupi gjykues që të mos jenë prezentë në shpallje të aktgjykimit, me arsyetimin e temperaturave të larta që mbizotërojnë brenda sallave në Pallatin e Drejtësisë.

Bazuar në aktakuzën e Prokurorisë Speciale, më 6 dhjetor të vitit 2022 është kryer sulm terrorist ndaj zyrave të KKZ-së në Mitrovicë të Veriut dhe një autoambulancë është përdorur për bartjen e granatave të dorës.

Sipas aktakuzës, granatat i ka marrë i akuzuari Milun Milenkoviç, i cili gjatë paraqitjes së fjalës përfundimtare të tij në seancën paraprake gjyqësore i ka mohuar akuzat.

Ndërkaq, Aleksandar Vlajiç, Dejan Pantiç dhe Miomir Vakiç janë të akuzuar se kanë hedhur granata dore dhe shok bomba me qëllim të detyrimit të organeve publike të Kosovës për t’u tërhequr nga organizimi i zgjedhjeve në veriun e banuar kryesisht me serbë.