Sulmi në “Trepçë”, Kurti: S’ka individ e as grup më të fuqishëm se shteti!

Kryeministri i Kosovës Albin Kurti, duke e dënuar sulmin ndaj ushtruesit të detyrës së kryeshefit të ndërmarrjes “Trepça”, Enis Abdurrahmani, dhe drejtorit të administratës, Besim Haxhiu, në zyrat e kësaj ndërmarrje, tha se nuk do të lejojë që asnjë individ e as grup të jetë më i fuqishëm se shteti, duke u zotuar për mbështetjen e menaxhmentit.

“Na vjen shumë keq çfarë ka ndodhur, një sulm i organizuar e i dhunshëm mbi udhëheqjen por me këtë rast e dënojmë ashpër këtë sulm dhe nuk është në të mirën e askujt. Si kryeministër i vendit, zotohem se nuk do të ketë asnjë individ e as grup më të fuqishëm se shteti. E ata që dëshirojnë këtë, bien ndesh me ligjin”, tha Albin Kurti pas takimit që pati me udhëheqjen e ndërmarrjen “Trepça” duke shtuar se kishte marrë lajme të mira për nxjerrjen e xeheve dhe rritjen e çmimeve në bursë si rrallë herë.

“Sot erdhëm këtu në Trepçë që të takohemi me udhëheqësit e saj, diskutuam për situatën në Trepçë dhe mund të them se jam i inkurajuar me faktin që në muajin shtator ka pasur prodhim mbi 16 ton xehe në minierën e Stantërgut dhe mbi 4 mijë në atë të Kishnicës në  Artanë, pra në total janë mbi 20 mijë tonë në muajin shtator.

Në anën tjetër është lajm i mirë për Trepçën se çmimet në bursë janë ngritur, janë të larta si rrallë herë. Pra diku mbi 3 500 ton. Jemi të lumtur kur ishim në pranverë në Qeveri, e kemi dëshmuar se jemi shumë të interesuar për Trepçën dhe këtë e kemi bërë materialisht, ku në kushte gjendje pandemike, e kur ishim në gjendje shumë të vështirë edhe politike, ne i kemi ndarë mbi 7 milionë euro për Trepçën. Për dt vjet do të investojmë së paku 70 milionë euro,” tha Kryeministri i Kosovës, Albin Kurti ndërsa Ushtruesi i detyrës së kryeshefit të “Trepçës”, Enis Abdurrahmani u ka bërë apel minatorëve që të ndërpresin grevën, duke shtuar se e kanë mbështetjen e Qeverisë për çdo vendim.

“Nga këtu i bëjmë apel minatorëve dhe punëtorëve që të kthehen në vendin e tyre të punës. Ne si menaxhment e gëzojmë mbështetjen e plotë të Qeverisë dhe për çdo gjë ne do të mundohemi t’i përkrahim, qoftë ajo në formë materiale apo me pako tjera sociale që premtohen nga shteti,” tha Abdurrahmani duke akuzuar ish-kryeshefin e Trepçës, Rafet Ibishin, për sulm me qëllim dëmtimin e pronave të ndërmarrjes.

Ndryshe, Kryeministri i Kosovës Albin Kurti, gjatë vizitës në ndërmarrjen “Trepça” ishte i shoqëruar nga ministrja e Ekonomisë, Artane Rizvanolli.