Sulmi terrorist në Banjskë, Kurti: E kreu Klani i Novi Sadit i udhëhequr nga Ministri i Mbrojtjes

Sulmin terrorist serb në Banjskë e ka organizuar Klani i Novi Sadit, në krye të cilit ndodhet Ministri i Mbrojtjes i Serbisë, Milosh Vuçeviç, tha sot Kryeministri i Kosovës, Albin Kurti, duke mos përjashtuar dhe lidhjen që mund të kenë 40 pelegrinët ortodoksë që ishin ditën e 24 shtatorit në Manastirin e Banjskës ku ishin strehuar terroristët serb me gjithë armatimin e tyre, porpër këtë, tha ai, duhet të tregojnë hetimet.

“Sulmin paramilitar e terrorist në Banjskë të Zveçanit e ka organizuar Klani i Novi Sadit. Në krye të tij ndodhet Ministri i Mbrojtjes së Serbisë, Milosh Vuçeviç. Ai është kryetari i partisë-shtet SNS, tri herë i zgjedhur kryebashkiak i Novi Sadit me ndihmën e Zvonko Veselinoviqit, dhe miku më i afërt i vëllaut të Presidentit të Serbisë, Andrej Vuçiç,” tha Albin Kurti në reagimin e tij përmes rrjetit social Facebook duke shtuar:

“Rreth 40 pelegrinë ortodoksë në Manastir të Banjskës me 24 shtator ishin nga Novi Sadi. Ndoshta e rastësishme, hetimet duhet ta tregojnë. Grupi terrorist në arrati i udhëhequr nga Millan Radoiçiq po qëndron në Rashkë. Atyre MUP-i famëkeq serb iu ka ndarë vetura të tipit Shkoda Oktavia me ngjyrë të bardhë dhe të zezë e me tabela regjistrimi BG dhe… NS.”

Në fund, duke siguruar se në katër komunat veriore të Kosovës po merr fund terrori, kriminaliteti dhe kultura e dhunës e paramilitarëve të tifozëve të Crvena Zvezdës, Kryeministri i Kosovës, Albin Kurti, përfundon:

“Kosova nuk ka jurisdiksion në Serbi. A nuk do të duhej që BE-ja dhe ShBA-të ta formojnë një Gjykatë Speciale për Klanin e Novi Sadit? Mafia ballkanike do të përjetonte goditje fatale, ndërkaq rajoni i Ballkanit do të hapej i tëri për demokraci evropiane, drejtësi ligjore, paqe të qëndrueshme dhe zhvillim të përshpejtuar.”