Sulmi terrorist në Banjskë, të akuzuarit deklarohen të pafajshëm

 Tre të akuzuarit, Blagoje Spasojeviç, Vladimir Toliç dhe Dushan Maksimoviç, u deklaruan të pafajshëm për akuzat ndaj tyre, lidhur me sulmin terrorist në Banjskë.

Pas deklarimit të tyre, në Gjykatën Themelore në Prishtinë përfundoi seanca përgatitore për rastin e sulmit terrorist në Banjskë.

Gjyqtari i çështjes Arben Hoti, i njoftoi të akuzuarit dhe mbrojtësit e tyre se në afat prej 30 ditësh kanë të drejtë të bëjnë kundërshtimin e provave dhe të bëjnë kërkesë për hedhje të aktakuzës.

Dushan Maksimoviç, Blagoje Spasojeviç dhe Vladimir Toliç janë tre të dyshuarit që janë në masë të paraburgimit, të cilët në seancë u sollën nënë masa të rrepta sigurie. Të pranishëm në sall ishin edhe familjarët e të dyshuarve.

Më 11 shtator, kryeprokurori i Prokurorisë Speciale të Kosovës, Blerim Isufaj, e kishte konfirmuar aktakuzën e ngritur për rastin “Banjska”. Ata janë arrestuar pas sulmit të armatosur në Banjskë, në veri të Kosovës, kur një grup i armatosur serb sulmoi Policinë e Kosovës dhe vrau policin, Afrim Bunjaku. Gjatë shkëmbimit të zjarrit, më pas, u vranë tre sulmues.

Përgjegjësinë për këtë sulm terrorist e mori Nënkryetari i Listës Srpska, Milan Radoiçiç, i cili po strehohet në Serbi ndërkohë ka dhënë dorëheqje nga posti i nënkryetarit të partisë më të madhe të serbëve në Kosovë, që mbështeten nga Presidenti i Serbisë, Aleksandar Vuçiç.