Sulmi terrorist në Zubin Potok, Hovenier: Nuk mund të përjashtohet asnjë grup apo shtet!
Institucionet e Kosovës kanë mbështetjen e Shteteve të Bashkuara dhe nuk përjashtohet asnjë grup apo shtet, tha Ambasadori i SHBA në Prishtinë, Jeffrey Hovenier, pas takimit që Ambasadorët e shteteve të Quintit zhvilluan me Kryeministrin e Kosovës, Albin Kurti, duke shtuar se është ende herët të thuhet se kush qëndron prapa sulmit të së premtes në kanalin e Ibër-Lepencit në Varagë të Zubin Potokut, dhe kjo kërkon hetim të kujdesshëm.
“Në këtë pikë, Shtetet e Bashkuara nuk janë në gjendje të thonë se kush qëndron prapa sulmit. Është herët për një gjë të tillë dhe këto gjëra kërkojnë hetim të kujdesshëm. Ajo që mund të them është se institucionet e Kosovës kanë mbështetjen tonë. Gjithashtu nuk jam në gjendje të përjashtoj asnjë grup, shtet apo ndonjë gjë tjetër. Është shumë herët, nuk e dimë ende,” tha Ambasadori amerikan në Kosovë duke e bërtë të qartë se SHBA ofron mbështetje në hetimin e këtij rasti dhe se këto veprime të dhunshme janë të pafalshme.
“Ne angazhohemi për përgjigjen emergjente nga autoritetet e Kosovës dhe ndihmojmë në zgjidhjen e asaj që mund të ishte situatë e tmerrshme. Qëndrojmë në solidaritet me Qeverinë e Kosovës!”
Ndërsa i dërguari i Bashkimit Evropian në Kosovë, Aivo Orav, tha se zyrtarët më të lartë të BE-së e kanë bërë të qartë qëndrimin e tyre për këtë rast, ku sulmi u konsiderua terrorist dhe sabotues.
Ndërkohë Kryeministri Albin Kurti ka akuzuar Beogradin zyrtar se qëndron pas këtij sulmi terrorist, duke tentuar që t’i lë pa ujë, pa rrymë, pa ngrohje e pa komunikim qytetarët e Kosovës.
“Ky sulm duket se ka ndërlidhje me sulmet masive të Federatës ruse ndaj Ukrainës, me ç’rast këto sulme ishin të orkestruara kundër infrastrukturës energjetike në Ukrainë. Qëllimi është që popullsia të vihet përfundi kushteve jetike, të minimumit të ekzistimit dhe të dëmtohet jeta e siguria e qytetarëve. Në të njëjtën kohë, kemi sulme në objektin e Komunës së Zveçanit, e në të njëjtën kohë edhe në Ukrainë.”
Ndryshe pas sulmit terrorist të së premtes në Zubin-Potokut ku në kanalin e Ibër-Lepencit u vendos 20 kilogramë lëndë shpërthyese, Policia e Kosovaës ka arrestuar tetë persona ndërsa dje Gjykata Themelore në Prishtinë i ka caktuar masën e paraburgimit prej 1 muaji të pandehurit D.V me dyshimin se ka kryer veprën penale, rrezikim i rendit kushtetues me shkatërrimin apo dëmtimin e instalimeve dhe pajisjeve publike.
