Sulmi terrorist në Zubin Potok, Sveçla: Serbia përgjegjëse, 8 të arrestuar

Tetë persona janë arrestuar për rastin e sulmit terrorist në kanalin e ujit Ibër-Lepenc në Zubin Potok, tha Ministri i Punëve të Brendshme, Xhelal Sveçla, në një konferencë të jashtëzakonshme mbrëmjen e sotme ndërsa akuzoi Beogradin zyrtarë si përgjegjës për sulmin terrorist në Ibër-Lepenc.

Ministri i Punëve të Brendshme ka bërë të ditur se janë arrestuar dhe shoqëruar në stacione policore tetë persona të dyshuar për përfshirje në veprime kriminale e terroriste, si dhe janë konfiskuar një arsenal armësh, eksplozivësh e uniformash.

“Pas hetimeve intensive, sot në orët e mëngjesit në 10 lokacione kemi realizuar kontrolle, ku janë arrestuar 8 persona si të dyshuar për përfshirje në veprime kriminale dhe terroriste. Kontrolli është realizuar në bashkëpunim me organet e drejtësisë dhe AKI-në. Në këto aksione janë konfiskuar armë, eksplozivë, uniforma e gjëra tjera që do t’i shërbejnë hetimit,” tha Xhelal Sveçla duke saktësuar se shumica e pajisjeve janë të prodhimit serb, por që disa pajisje janë ekskluzive ushtarake që nuk gjenden as në tregun e zi.

“Eksplozivi i përdorur mbrëmë është material që vështirë që gjendet, pos që furnizimet janë nga magazinat e ushtrisë. Ne besojmë se ato kanë dalë nga magazinat e ushtrisë së Serbisë. Policia e Kosovës do ta verifikojë këtë.”

Me këtërast, ministri i Punëve të Brendshme akuzoi Serbinë si përgjegjëse për sulmin terrorist në kanalin e Ibër-Lepencit.

“Sulmet e vazhdueshme të grupeve kriminale terroriste siç janë sulmet e fundit me granata në Zveçan dhe tani edhe sulmi i fundit terrorist i ndodhur mbrëmë ndaj infrastrukturës kritike janë sulme që dirigjohen nga Serbia dhe për këtë e mbajmë përgjegjës Beogradin zyrtar,” tha Sveçla duke e cilësuar shpërthimin në Zubin Potok si aktin më të rëndë të pasluftës.

“Ky sulm terrorist s’është vetëm një sulm i rëndomtë, por i organizuar dhe planifikuar mirë nga grupe apo organizata që janë profesioniste në kryerjen e sulmeve të tilla terroriste e të cilat shkaktojnë dëme të mëdha ndaj infrastrukturës kritike. Pra synimi i tyre ka qenë të maksimizohet dëmtimi ndaj Kosovës dhe qytetarëve të saj,” tha ministri i Punëve të Brendshme, Xhelal Sveçla, duke siguruar qytetarët e Kosovës:

“Qeveria e Kosovës me institucionet e saj nuk do të ndalet derisa të gjithë këta kriminelë e terroristë të arrestohen dhe të përballen me drejtësinë, me fuqinë e ligjit të drejtë të Republikës së Kosovës.”

Hoxha: Janë konfiskuar arsenal armësh e uniformash ushtarake

Ndërsa Drejtori i Përgjithshëm i Policisë Kosovës, Gazmend Hoxha, tha se tre sulmet e fundit në veri janë kualifikuar si sulme terroriste që kanë pasur synim ta cenojnë sigurinë e Kosovës, dhe të arrestuarit, sipas tij, mund të kenë lidhje me kryeterroristin Milan Radoiçiç, por do të jenë hetuesisë që do të konfirmojnë rolin e secilit të arrestuar.

Drejtori i Përgjithshëm i Policisë Kosovës tha se gjatë bastisjeve të sotme kanë konfiskuar mbi 200 uniforma ushtarake, 6 zola, 3 granata dore, 2 armë AK47, 1 revole, municion të kalibrave të ndryshëm, fitila ndezës për inicim të lëndëve plasëse, helmeta ushtarak, maska, thika, para dhe pajisje të tjera.

Ndërkohë në një bastisje në Zveçan, Policia ka konfiskuar sasi të konsiderueshme armatimi, 2 AK47, 3 revole, 1 armë gjuetie, 2 armë rekreative, 6 karikator të AK47, municion e uniforma ushtarake.

Gazmend Hoxha ka dhënë detaje edhe për shpërthimin në Ibër-Lepenc.

“Në bazë të hetimeve në vendin e ngjarjes, dyshohet se në këtë sulm është përdorur një sasi e konsiderueshme e eksplozivit 15-20 kilogram, e cila ka qenë e vendosur në një çantë të zezë dhe e cila është aktivizuar me detonatorë mekanik përmes fitilit ndezës me djegie të ngadalshme.

Si pasojë e këtij sulmi janë shkaktuar dëme të mëdha materiale në kanalin e Ibër-Lepencit, ku është ndërprerë furnizimi me ujë të pijshëm për shumë zona dhe lokalitete, duke rrezikuar tej mase edhe furnizimin me energji elektrike apo edhe rrezikun me pasoja më të rënda për avari në sistemin energjetik të Kosovës,” tha Hoxha duke shtuar se materialet dhe dëshmitë që janë gjetur dyshohet se lidhen me sulmin e mbrëmshëm.

“Duhet të kuptoni që po flasim për një rast shumë të rëndë. Nëse ne japim shumë informacione, dëmtojmë procesin tonë. Janë materiale e dëshmi që janë gjetur në bastisjet e sotme, e që dyshohen të lidhen me sulmin e mbrëmshëm. Neve na mbetet punë me bë, punë e hetuesve tanë me përcaktu rolin e secilit në përfshirjen e terroristëve në këto akte kriminale.”

Në fund, Drejtori i Përgjithshëm i Policisë Kosovës, Gazmend Hoxha, tha se gjatë muajve të fundit institucionet e Kosovës janë sfiduar nga grupet e caktuara kriminale dhe terroriste, të cilat me përdorimin e armëve kanë për qëllim të cenojnë dhe të kërcënojnë sigurinë dhe rendin kushtues të Republikës së Kosovës ndërsa përfundoi:

“Që nga muaji qershor i vitit 2024, në komunat me shumicë serbe në veri të vendit janë evidentuar 10 raste të sulmeve me mjete shpërthyese, të cilat ishin të drejtuara ndaj qytetarëve të Republikës së Kosovës pa dallim etniciteti, pronës së tyre, ndaj institucioneve të Kosovës, si dhe ndaj infrastrukturës kritike të vendit.”