Sulmi terrorist në Zubin Potok, Vuçiç e mohon të ketë lidhje, bën moral dhe tregon forcën

Ndryshe nga herë të tjera kur sapo vënte këmbën një polic i Kosovës në veri, Presidenti i Serbisë, Aleksandar Vuçiç thirrte urgjent Këshillin e Sigurisë, sot ai përveç se e mohoi sulmin e mbrëmshëm terrorist në Zubin Potok bëri dhe moral se si ai kurrë nuk ka nxituar të reagonte e sa për sulmin, po të ndonte, jo sistemin Ibër-Lepenc por dhe lumin do ta kthente përpjetë.

“Dhe një gjë ta mësoni nga unë, në veçanti ju që jeni në politikë. Kurrë mos iu nënshtroni rrugës. Kurrë. S’ka lidhje me ditën e sotme, por për të nesërmen. Kurrë. Kur ka përndjekje ndaj dikujt, largohuni dhe mos merrni pjesë. Përfundimin merrni kur kalon e gjitha. Kurrë mos merrni vendime nën frikë. Kurrë nën presion mos merrni vendime.

Çfarë mendoni, pse nuk nxitova në mëngjes në orën gjashtë të them se Serbia nuk ka kurrfarë lidhje me atë që ka ndodhur në Ibër-Lepenc. Ta dini, ne mund ta bënim këtë dhe ta kthenim edhe lumin përpjetë, kurrfarë terrorizmi nuk na duhej, pse ti arsyetohem çdo kujt,” tha Vuçiç para të rinjëve të partisë së tij SNS duke shtuar se ata e dinë se ne nuk e kemi bërë, por harron se ministri i tij i Jashtëm, Marko Gjuriç, ka reaguar menjëherë jo vetëm duke dënuar aktin terrorist por ka akuzuar Albin Kurtin, se nxitimi i tij për të treguar me gisht nga Beogradi, tregon për implikimin e Prishtinës!

Ndryshe, Presidenti i Serbisë, Aleksandar Vuçiç, foli për sulmin terrorist të premtes duke shmangur tre sulmet terroriste që kanë ndodhur gjatë 72 orëve të fundit në Veri të Kosovës, duke filluar me sulmin me granatë dore të Komisiaritit të Policisë, godinës së Komunës Zveçan, dhe duke arritur kulmin me sulmin terrorist ndaj rrjetit të ujësjellësit të Ibër-Lepencit në fshatin Varagë të Zubin-Potokut.