Sulmi terrorist në Zubin Potok, arrestohet edhe një person me armë e municion në shtëpi

Policia e Kosovës ka bërë të ditur se ka arrestuar edhe një të dyshuar për sulmin terrorist në kanalin e Ibër-Lepencit në Zubin Potok, në shtëpinë e të cilit janë gjetur granata dore, armë e municion

“Në vazhdimësi të hetimeve lidhur me rastin e sulmit terrorist ndaj infrastrukturës kritike, por edhe rasteve paraprake, nga njësitë relevante hetimore, në bashkëpunim edhe me njësitë tjera policore, me datën 01/12/2024 në orët e mbrëmjes, është arrestuar edhe një i dyshuar (J.V.), nën dyshimin që mund të ketë pasur rol të rëndësishëm në kuadër të grupit përgjegjës për rastin e sulmit terrorist ndaj infrastrukturës kritike,” thekson Policia e Kosovës duke shtuar se në shtëpinë e këtij të dyshuari është gjetur armë dhe municion i konsiderueshëm. 

“Në bashkëpunim dhe koordinim të plotë me Prokurorinë Speciale të Republikës së Kosovës, është zbatuar kontrolli në shtëpinë ku banonte i dyshuari, me ç’rast janë sekuestruar dëshmi dhe prova materiale, si më poshtë: Katër granata dore, një pushkë gjuetie, mbi 500 copë municion të kalibrave të ndryshëm, dy karikatorë të armës automatike AK-47, një karikatorë i pushkës së gjatë, një radiolidhje, një palë dylbi, një kamerë kamufluese, uniforma ushtarake dhe dokumente të ndryshme.”

Ndryshe, me urdhër të Prokurorit të Prokurorisë Speciale, të dyshuarit i është caktuar masa e ndalimit policor prej 48 orëve, ndërkohë situatën në veri Policia e Kosovës e vlerëson të qetë por të brishtë.