Sulmuesi i New Yorkut dënohet me 10 burgime të përjetshme dhe 260 vjet burg

Një mbështetës i grupit militant, Shteti Islamik, është dënuar nga një gjykatë në New York me 10 burgime të përjetshme dhe 260 vjet burg, dhe nuk do të lirohet kurrë nga burgu.

Sayfullo Saipov vrau tetë persona pas shkeli me kamionin e tij këmbësorët dhe çiklistët në rrugët e Manhatanit më 2017.

Gjatë shqiptimit të dënimit, trupi gjykues tha se ai ka shkatërruar shumë jetë. Saipov nuk ka shfaqur pendesë gjatë gjykimit.

Saipov është përballur me familjarët e viktimave dhe të mbijetuarit në gjykatë dhe gjykatësi vuri në pah se i pandehuri ishte absolutisht i pappenduar.

Shtetasi uzbek, 35 vjeç, Sayfullo Saipov, kishte përdorur një kamion me qira për të kryer sulmin në New York më 2017.

Ai kishte bërtitur “Zoti është i madh” në gjuhën arabe dhe ishte qëlluar nga policia pasi kishte dalë nga kamioni. Saipov kishte shpresuar se ky akt do të bënte që ai të bëhej pjesë e grupit militant, Shteti Islamik.

Saipov pritet të vuajë dënimin në një burg të sigurisë së lartë në Kolorado, ku të burgosurit kalojnë deri në 23 orë në ditë të mbyllur në qelitë e tyre.

Pesë nga viktimat e Saipovit ishin turistë nga Argjentia, një grua 31-vjeçare ishte nga Belgjika. Edhe dy amerikanë ishin në mesin e viktimave, ndërkaq 12 të tjerë u plagosën.

Duke iu adresuar gjykatës para shqiptimit të dënimit, Saipov dukej se përsëriti lëvdatat për grupin terrorist dhe sugjeroi se nuk ishte i prekur nga dëshmitë që kishte dëgjuar.

Ai i shpëtoi dënimit me vdekje, raporton RFE, pasi një juri javën e kaluar nuk arriti një vendim unanim për këtë çështje.