Supermarketet, bien fitimet për të mëdhenjtë, si do të ndikojë hyrja në treg e “Lidl”

Njësitë e organizuara të shitjes me pakicë po marrin gjithnjë e më shumë tregun e dyqaneve të vogla, duke rritur me shpejtësi të ardhurat vitet e fundit.

Megjithatë, zinxhirët e mëdhenj të supermarketeve operojnë me norma relativisht të ulëta fitimi, rreth 4-6 për qind, të ndikuara si nga lloji i aktivitetit, ashtu edhe niveli i lartë i informalitetit në tregun e paorganizuar të pakicës.

Në vitin 2024, dy operatorët më të mëdhenj në treg kanë parë një rënie të lehtë të fitimeve, përkundrejt përmirësimit në 2023, të ndikuar nga një efekt më i ulët i kursit të këmbimit, teksa Euro ka rënë me ritme më të ngadalta se më parë.

As çmimet e shtrenjta nuk i kanë ndihmuar operatorët të kenë kthime më të larta, me përjashtim të rrjeteve që ofrojnë produkte për një klientelë të mesme.

Sipas Eurostat, për herë të parë që prej vitit 2005, çmimet e ushqimeve në vend kanë kaluar mesataren e BE-së me 1 për qind, ndërsa të ardhurat janë vetëm 41 për qind e saj.

Operatorët e tregut e lidhin këtë me koston e lartë të transportit, mungesën e ekonomisë së shkallës, rritjen e pagave dhe varësinë nga importet, pasi produktet vendase janë të pakta dhe shpesh jokonkurruese në çmim.

“Big Market”, zinxhiri më i madh i supermarketeve në vend, kishte të ardhura të konsoliduara sipas të dhënave zyrtare, rreth 27.7 miliardë lekë. Fitimet ranë lehtë me 4.1 për qind, në 1.46 miliardë lekë.

Norma e fitimit ishte 5.3 për qind, nga 5.73 për qind vitin e mëparshëm. Rrjeti i supermarketeve të “Big Market” ka njohur rritje të shpejtë vitet e fundit, duke arritur në 180 pika. Sipas burimeve zyrtare, kompania ka një fokus të veçantë në shtimin e gamës së produkteve bio.

-Rrjeti i supermarketeve “SPAR Albania” është zinxhiri i dytë më i madh i supermarketeve në vend. Sipas burimeve nga kompania, të ardhurat e konsoliduara të rrjetit SPAR rezultojnë 20 miliardë lekë në vitin 2024, nga e cila 61% erdhi nga rrjeti i vet dhe pjesa tjetër, nga sistemi franshise.

Fitimi total ishte 851 milionë lekë, me një tkurrje prej 4.4 për qind, gati gjysma e fitimeve erdhi nga rrjeti i vet.

Norma ra në 4.2 për qind, nga 4.7 për qind vitin e mëparshëm. Ndryshe nga rrjetet e tjera që mund të zgjerohen kryesisht përmes modeleve të ndryshme të partneriteteve apo zhvillimeve të decentralizuara, “SPAR Albania” funksionon në përputhje me një kontratë zyrtare franchise me “SPAR International”, duke ndjekur standarde të mirëpërcaktuara dhe të njohura globalisht për operimin e supermarketeve dhe hipermarketeve nën logon e markës SPAR, sqarohet në raportin e aktivitetit.

Rënia e fitimeve shpjegohet me ndikimin e luhatjeve të kursit të këmbimit.

“Viti 2024 ka pasur fitim nga kursi i këmbimit më të ulët se viti 2023. Rritja e fitimit pa efektin e kursit të këmbimit vazhdon me trendin organik në përputhje me rritjen e shitjeve dhe operacioneve të shoqërisë edhe për vitin 2024”, thuhet në raportin e aktivitetit.

Në mars 2025, Grupi BALFIN, që zotëronte “Spar Albania” i shiti aksionet te sipërmarrja nga Kosova, “Viva Fresh Store”.

-“Conad Albania” raportoi të ardhura prej 4.1 miliardë lekësh në vitin 2024. Fitimi, ndryshe nga operatorët e tjerë më të mëdhenj, vijoi tendencën rritëse, me 9.3 për qind, duke arritur në 630 milionë lekë.

Norma e fitimit është gjithashtu më e lartë, për shkak të segmentimit me çmime më të shtrenjta të produkteve duke rezultuar në 14.2 për qind, nga 14.4% vitin e mëparshëm.

Ndër faktorët kryesorë që kompania vlerëson të kenë ndikuar pozitivisht në ecurinë e aktivitetit në vitin 2024 janë rritja e konsumit të produkteve cilësore; stabilizimi i kursit të këmbimit Lek/Euro; rritja e PBB-së dhe fuqisë blerëse; ndryshimi i preferencave drejt produkteve të shëndetshme.

“Diambe”, pasi ka hyrë prej tre vitesh në renditjen sipas të ardhurave, është pjesë për herë të parë dhe në atë të fitimeve.

Të ardhurat e kompanisë ishin 4.9 miliardë lekë, ndërsa fitimet në vitin 2024 ishin 222 milionë lekë, ose 54 për qind më shumë se një vit më parë. Edhe norma e përfitueshmërisë u përmirësua në 4.6 për qind, nga 3.8 për qind në vitin 2023. Zinxhiri i marketeve zbaton konceptin e “discount” në vend dhe ka filluar aktivitetin në vitin 2014.

“Extramarket” ishte në listën e 200 më të mëdhave sipas qarkullimit vjetor në vitin 2024, me 2.9 miliardë lekë të ardhura.

Operatori ka dalë nga lista e “Monitor 200” sipas fitimeve, pavarësisht se rezultati para taksave arriti në 207 milionë lekë, me rritje 24 për qind, për shkak të pragut më të lartë të 200-shes.

Edhe norma e fitimit u përmirësua në 7 për qind, nga 6.4 për qind vitin e mëparshëm. Kompania thotë se investimet e realizuara vitet e fundit – përfshirë ndërtimin e selisë dhe magazinës së re, si dhe rikonstruksionin e disa pikave të shitjes – kanë mundësuar përmirësimin e organizimit të shpërndarjes, transportit dhe mbikëqyrjes së punës në të gjitha hallkat e saj.

Rrjetet e tjera, ndonëse kanë rritur ndjeshëm qarkullimin vjetor, vijojnë të rezultojnë me fitime minimale, ose humbje.

“D & D Distribution”, ish–“Eco Market Food”, me aktivitet në fushën e prodhimit, magazinimit dhe tregtimit të prodhimeve e ushqimeve blegtorale e bujqësore, raportoi të ardhura rreth 2.6 miliardë lekësh në vitin 2024, duke qenë në listën e më të mëdhenjve sipas xhiros.

Por kompania ka deklaruar humbje në vitin 2024, prej 11 milionë lekësh.

“Xhangolli Group”, shoqëria që menaxhon rrjetin e supermarketeve “Xhangolli”, ishte në listën e të ardhurave për të dytin vit radhazi. Në vitin 2024, qarkullimi vjetor i shoqërisë rezultoi 3.4 miliardë lekë. Fitimet ishin minimale në 24 milionë lekë, duke mbetur jashtë kësaj liste.

Rrjetet e tjera të pakicës

“Rossmann-Lala”, rrjeti gjermano-shqiptar i marketeve, po rezulton një nga sipërmarrjet me model të qëndrueshëm biznesi.

Në vitin 2024, qarkullimi i saj vjetor arriti në 6.9 miliardë lekë. Fitimet u rritën me 20%, duke arritur rekordin e 1.16 miliardë lekëve. Norma e fitimit është ndër më të lartat në njësitë e organizuara të tregtimit me pakicë, duke arritur në 16.9 për qind, nga 6.4 për qind në vitin 2023.

Aktiviteti i saj shtrihet në të gjithë Shqipërinë, duke operuar në një rrjet prej 23 dyqanesh, nga të cilat 16 me vendndodhje në Tiranë. Gjatë vitit 2024 janë hapur dy dyqane të reja, një në Tiranë dhe një në Lezhë. Shoqëria ka aktivitet dhe në Kosovë.

“Megatek”, hipermarketi më i madh “Bëje vetë”/DIY në Shqipëri, ka raportuar të ardhura prej 3.1 miliardë lekësh në vitin 2024. Fitimet ranë me 5.3 për qind, në gati 500 milionë lekë.

Norma e fitimit ishte 16.3 për qind, nga 16.5 për qind në vitin 2023. Sipas raportit vjetor, “Megatek” ka bërë përmirësime thelbësore në strukturën e saj të shitjes, e cila ka çuar në rritje dhe qëndrueshmëri të fitimit.

Pritet shtimi i konkurrencës nga hyrja në treg e “Lidl”

Zhvillimet e fundit tregojnë se “Lidl” është në fazë përgatitore për të hyrë në tregun shqiptar. Ky rrjet gjerman supermarketesh, me prani në 31 vende dhe mbi 12,350 dyqane në mbarë botën, po përgatit infrastrukturën për të hyrë në Shqipëri.

Agjencia për Zhvillimin e Investimeve të Huaja, AIDA, ka bërë të ditur në faqen e saj të internetit se marka ndërkombëtare “Lidl”, rrjeti më i madh gjerman i supermarketeve me shtrirje në mbarë botën, ka shprehur interes për Shqipërinë, teksa ka marrë tashmë statusin e investitorit strategjik.

AIDA, në bashkëpunim me Autoritetin Portual të Durrësit, APD, prej disa kohësh po ndihmon gjigantin e shitjes me pakicë “Lidl” në zgjerimin e veprimtarisë së tij në Shqipëri.

Sipas AIDA-s, kompania e ka identifikuar Shqipërinë si një treg me potencial të madh, duke e vlerësuar për orientimin e lartë të konsumatorëve drejt produkteve me cilësi të lartë dhe çmimeve konkurruese.

Një ndër projektet më ambicioze është ndërtimi i një qendre logjistike në Porto Romano në Durrës, me një investim të parashikuar prej 105 milionë eurosh. Kjo qendër do të shërbejë si bazë për furnizim dhe shpërndarje të produkteve në të gjithë vendin.

Projekti pritet të krijojë rreth 2.500 vende pune dhe të përmirësojë zinxhirin e furnizimit, duke integruar edhe prodhuesit vendas në një rrjet modern shpërndarjeje, ndërsa synimi afatgjatë është shtrirja kombëtare me supermarkete të reja.

Me hyrjen e “Lidl” në tregun shqiptar, pritet që konkurrenca të intensifikohet, çmimet për konsumatorët të bëhen më tërheqëse dhe standardet e supermarketeve të rriten.

Gjithashtu, ky investim mund të hapë mundësi për prodhues dhe furnizues vendorë që të integrohen në zinxhirin e furnizimit të rrjetit ndërkombëtar.

Veshjet, të mëdhenjtë u marrin tregun të vegjëlve

Në vitin 2024, importet e veshjeve për katër grup-kapituj kryesorë, që përfshijnë veshje për burra dhe gra, ranë me 9.2 për qind, sipas të dhënave nga Doganat, duke treguar një tendencë të rënies së konsumit, e ndikuar nga emigracioni i të rinjve dhe ndryshimi i stilit të jetesës pas pandemisë.

Linjat e mëdha të organizuara nuk rezultojnë të jenë prekur nga kjo prirje, teksa ato po marrin tregun e dyqaneve të vogla nga njëra anë dhe nga ana tjetër kanë përfituar nga një klientelë e re, ajo e turistëve.

Operatorët e tregut pohojnë se kërkesa më e lartë është për markat me çmime të lira, ndërsa kategoria që shpenzon më shumë për veshje mbeten gratë duke përfshirë edhe blerjet për fëmijë.

Tregtimi i veshjeve nga linjat e organizuara po rezulton një biznes i mirë dhe këtë vit ka katër shoqëri në listën e më të mëdhave sipas fitimeve të “Monitor 200”.

Normat e kthimit mbeten të kënaqshme, duke u luhatur nga 10 në 37%. Të dhënat e bilanceve tregojnë se dyqanet që janë të segmentuara në tregtimin e veshjeve të lira kanë pasur dhe rritjen më të madhe të fitimeve në vitin 2024.

Në biznesin e veshjeve në vend, më i madhi sipas qarkullimit vjetor, mbetet “ITX Albania”, që kishte të ardhura rreth 7.2 miliardë lekë në vitin 2024, me rritje 10.4 për qind në raport me vitin e mëparshëm.

Fitimet u rritën ndjeshëm me 25 për qind, në 2.16 miliardë lekë. Norma e fitimit arriti në 29 për qind, nga 26.3 për qind vitin e mëparshëm.

“LC Waikiki Retail AL” raportoi të ardhura 6.2 miliardë lekë, me rritje prej 10.4 për qind në krahasim me vitin e mëparshëm. Pas rënies së vitit të mëparshëm, fitimet u rritën ndjeshëm me 82 për qind, në 686 milionë lekë.

Norma e fitimit u përmirësua në 11 për qind, nga 7 për qind vitin e mëparshëm. Mehmet Memo, menaxher për Shqipërinë i kompanisë, pohon se kërkesa për veshjet në dyqanet e “Waikiki Albania” ka shënuar rritje të lehtë këtë vit krahasuar me një vit më parë.

“Kjo rritje mund të lidhet me disa faktorë, përfshirë përmirësimin e ekonomisë dhe rritjen e turizmit. Gjithashtu, kemi vërejtur interes të shtuar për koleksionet e reja dhe ofertat speciale që kemi prezantuar këtë vit, të cilat kanë tërhequr një numër të madh konsumatorësh”.

“In Sport” është e profilizuar në tregtimin e këpucëve e veshjeve sportive. Në vitin 2024, shoqëria raportoi të ardhura prej 2 miliardë lekësh, pothuajse në të njëjtin nivel me vitin e mëparshëm. Fitimet ishin rreth 512 milionë lekë.

Norma e fitimit mbetet ndër më të lartat në këtë treg, me rreth 25 për qind. Semi Gjyli, menaxherja ekzekutive e “Sport Vision Group” (emri tregtar i “In Sport”) thotë se rritja e ndërgjegjësimit për rëndësinë e aktivitetit fizik ka ndikuar ndjeshëm në ecurinë e kërkesës së artikujve sportivë në Shqipëri.

Ajo shton se të rinjtë priren gjithnjë e më shumë të investojnë në atlete dhe veshje sportive që i shërbejnë jo vetëm aktivitetit fizik, por edhe përditshmërisë urbane.

Nga ana tjetër, rritja e ndjeshme e turizmit ka sjellë edhe ndikim pozitiv në kërkesën për produkte të përshtatshme për udhëtime dhe aktivitete në natyrë.

“New Yorker Albania”, linja ndërkombëtare e përqendruar në tregtimin e veshjeve të lira, ka hyrë për herë të parë në listën e kompanive më të mëdha sipas fitimeve.

Të ardhurat e kompanisë ishin 725 milionë lekë, me rritje 11.5 për qind. Fitimet u zgjeruan ndjeshëm me 50.4 për qind, duke arritur në 270 milionë lekë. Ky operator kishte dhe normën më të lartë në biznesin e veshjeve të të mëdhenjve, me 37 për qind.

“Balkan Sport”, me aktivitet në tregtimin e artikujve të ndryshëm sportivë, raportoi rënie të të ardhurave me 6.2 për qind, në 1.7 miliardë lekë. Edhe fitimet u tkurrën me 21 për qind, në 168 milionë lekë, duke dalë nga lista e 2024-s e “Monitor 200”. Norma e kthimit ishte 10 për qind.

“Fashion Group Albania”, që menaxhon me rrjetin e saj një sërë dyqanesh “Aldo”, “Carpisa”, “Cortefiel”, “Geox”, “Mango”, “Okaidi”, “Parfois”, “Prenatal”, “Springfield”, “Woman Secrets”, raportoi të ardhura prej 1.2 miliardë lekësh, me rritje 10 për qind.

Fitimet para taksave ishin 145 milionë lekë, në vitin 2024, pothuajse në të njëjtat nivele me vitin e mëparshëm.

Norma ishte 12 për qind. Në shtator 2025, Grupi BALFIN shiti 100 për qind të aksioneve që zotëronte në “Fashion Group Albania” te kompania me kapital nga Kosova, “Albi Holding”.

“Koan sh.p.k.” është një tjetër shoqëri me fitime të larta. Të ardhurat ishin 764 milionë lekë ose +44 për qind dhe fitimet 159 milionë lekë -27 për qind. Norma ishte 20 për qind. Sipas Administratorit Ardian Davidhi, kompania operon në tregun shqiptar si një markë e specializuar në veshje për gjueti dhe ngjitje në mal.

Sipas tij, artikujt më të kërkuar aktualisht janë veshjet për hiking, të cilat po pëlqehen gjithnjë e më shumë nga të rinjtë.

Tendenca është në rritje edhe mes turistëve, të cilët tregojnë interes të veçantë për veshje funksionale gjatë eksplorimeve në destinacionet malore më të njohura të vendit, si Thethi dhe Valbona.

Zoti Davidhi pohon se kërkesa në rritje reflekton jo vetëm zhvillimin e turizmit aktiv, por edhe ndërgjegjësimin më të madh për cilësinë dhe funksionalitetin e veshjeve në natyrë.

“Defacto Retail” hyri në listën e fitimeve vetëm në 2021 dhe doli një vit më pas. Në vitin 2024, subjekti raportoi 772 milionë lekë të ardhura dhe 81 milionë lekë fitime.

Në mars të vitit 2023, në tregun shqiptar hynë edhe veshjet e markës “H&M”, i cili është shitësi i dytë më i madh ndërkombëtar i veshjeve, pas “Inditex”, kompania mëmë e “Zara”.

Në Shqipëri, operatori nuk ka pasur një rritje të shpejtë, ndryshe nga aktiviteti i “Inditex”.

“H & M Hennes & Mauritz Albania SH.P.K” nuk e ka deklaruar bilancin e vitit 2024, por sipas të dhënave paraprake nga Tatimet ka qarkulluar rreth 700 milionë lekë. Kompania nuk është as në listën e fitimeve.

Sipas të dhënave nga stafi, konsumatorët shqiptarë tregojnë interes të lartë për veshjet bazë si çorape, të brendshme, bluza, pantallona dhe hoodies pa logo, produkte të thjeshta, praktike dhe të përdorshme çdo ditë./Monitor/