Tabaku: Qeveria ka rritur taksat me 5 miliardë euro, nuk gjen dot 30 milionë për Teatrin…

Deputetja demokrate Jorida Tabaku u shpreh sot gjatë mbledhjes së Komisionit të Ekonomisë, se qeveria ka rritur taksat me 5 miliardë euro, por nuk gjen dot 30 milionë për të ndërtuar Teatrin Kombëtar.

“Kjo është grabitja më e madhe e pronës publike. Sot e keni kthyer parlamentin në zyrë tenderash e koncesionesh se keni frikë ta miratoni vetë.

Sot me aferën e Teatrit po pastrohen paratë e krimit dhe të drogës e kam një vit që e them e ka shkuar në vesh të shurdhët. Sot në rend dite duhet të ishte Teatri Kombëtar”, tha Tabaku.

Sipas saj, drafti ligjor i qeverisë është bashkëfirmosur nga Ministrja e Kulturës dhe zv/Ministri i Ekonomisë dhe Financave, ndërsa shtoi se ministri i Financave, Arben Ahmetaj, duhet të flasë vetëm për këtë çështje.

“Çdo diskutim që ne kemi bërë në këtë Komision ka rezultuar e vërtetë. Kemi denoncuar prej një muaj e gjysëm çështjen e Ministrit të Brendshëm dhe çështjen e pastrimit të parave, i cili u reflektua edhe në rënien e Euros që sot pensionistët, bizneset dhe emigrantët po e vuajnë. Kemi ngritur shqetësimin për ritjen e taksave dhe konkretisht atë të pronës, dhe rezultoi e vërtetë”, theksoi Tabaku.