“Tahiri”/ Thirrje ndërkombëtarëve, PD: Mos lejoni që një kriminel si Saimir Tahiri të shpëtojë pa u ndëshkuar
Pasi Gjykata për Krime të Rënda pranoi kërkesën e Ish-Ministrit Saimir Tahirit, duke i limituar kohën Prokurorisë deri më 10 mars për të vendosur përfundimisht nëse do kalojë në gjykim, apo do mbyllen hetimet, Partia Demokratike reagon përmes deputetit dhe Nënkryetarit të Komisionit parlamentar për Siguri, Flamur Noka duke theksuar se PD ka paralajmëruar se Tahiri do të shfajësohet nga akuza për trafik droge dhe këtij skenari i shërbeu edhe vendimi i sotëm për të ndërprerë praktikisht hetimet e prokurorisë për Saimir Tahirin:
“Fillimisht, Edi Rama përdori parlamentin për të penguar hetimet e grupit të prokurorëve, duke mos dhënë autorizimin për arrestimin e Ministrit të Brendshëm. Pastaj, përdori Arta Markun për të shpërbërë grupin e prokurorëve, siç u faktua, në kundërshtim me ligjin, dhe tani, Edi Rama po përdor gjykatën për të penguar vijimin e hetimeve,” thekson Flamur Noka, pikërisht në kohën kur prokurorët presin përgjigje nga Mali i Zi për aktivitetin e Saimir Tahirit dhe lidhjet e tij me grupin e Habiljave.
“Kjo do të thotë se, nëse brenda 3 javëve Mali i Zi nuk kthen përgjigje, dosja mund të shkojë në gjykatë e paplotë. Sado që drejtësia e kontrolluar nga Edi Rama ta lehtësojë Saimir Tahirin, në dosjen e tij ka fakte të rënda të përfshirjes së familjarëve më të afërt të Saimir Tahirit me grupin e Habiljave.”
Në vend që Edi Rama t’u thotë shqiptarëve t’i kërkojnë falje Saimir Tahirit, thekson Noka, është më mirë të ngarkojë dikë që t’i përgjigjet një pyetje të thjeshtë, duke shtuar:
“A kanë udhëtuar së bashku me Habilajt, të cilët ai i quan llum, babai dhe bashkëshortja e Saimir Tahirit? “
Vendimi i gjykatës për të penguar vijimin e plotë të hetimeve, konstaton Partia Demokratike, vjen pas kërcënimeve publike të pak kohëve më parë të vetë Saimir Tahirit.
“Me mbështetjen publike të Edi Ramës ai kërcënoi çdo polic, prokuror dhe gjyqtar që të mos guxojnë të vazhdojnë hetimin ndaj tij. Vendimi i sotëm i Gjykatës është një tjetër goditje e rëndë ndaj Reformës në Drejtësi,” thekson Ish-Ministri i Brendshëm, Flamur Noka duke vlerësuar se është momenti që partnerët e huaj, të cilët i premtuan popullit shqiptar drejtësi të vërtetë dhe kapjen e peshqve të mëdhenj, të mbajnë premtimin dhe të mos lejojnë që një kriminel si Saimir Tahiri të shpëtojë pa u ndëshkuar.
Është momenti edhe për të gjithë ata shqiptarë, të cilët duan një drejtësi të barabartë për të gjithë, të mos rrinë më të heshtur, thekson deputeti i Partisë Demokratike, Flamur Noka duke i ftuar që ta bashkojnë zërin e tyre me zërin e mijëra shqiptarëve të tjerë në 16 shkurt përpara kryeministrisë:
“Për t’u dhënë shans Shqpërisë të bëhet një vend normal, ku drejtësia është në shërbim të njerëzve të zakonshëm dhe jo të kriminelëve me pushtet!”
