Takim me Ambasadorët e BE, Basha: Integrimi Europian prioriteti kryesor i PD

Pas takimit me Ambasadorët e shteteve anëtare të Bashkimit Europian ku ishte prezent dhe Ambasadori i BE në Tiranë, Luigi Soreca, Kryetari i Partisë Demokratike, Lulzim Basha, tha se për PD, BE do të thotë votë e lirë, pavarësi e institucioneve, liri dhe pavarësi e mediave, ndarje e politikës nga krimi dhe luftë ndaj korrupsionit.

“Diskutime të frytshme sot me ambasadorët e vendeve të Bashkimit Europian. Integrimi Europian i Shqipërisë ka qenë dhe mbetet prioriteti kryesor i Partisë Demokratike, ndaj do të bëjmë gjithçka që vendi ynë të ecë përpara në këtë rrugëtim kaq të rëndësishëm për qytetarët tanë,” thekson Lulzim Basha përmes rrjetit social Facebook duke zbardhur dhe detaje nga takimi.

“Për ne BE do të thotë votë e lirë, pavarësi e institucioneve, liri dhe pavarësi e mediave, ndarje e politikës nga krimi dhe luftë ndaj korrupsionit. Pa këto nuk mund të ketë as zhvillim, as integrim dhe as demokraci. 25 prilli nuk kishte asnjë lidhje me demokracinë dhe për Partinë Demokratike nuk mund të quhet një kapitull i mbyllur,” thekson Kryetari i PD, Lulzim Basha, para Ambasadorëve të shteteve anëtare të BE duke përfunduar:

“Prandaj ne do të kërkojmë deri në fund hetimin e krimeve zgjedhore, ndëshkimin e fajtorëve dhe kthimin e legjitimitetit dhe demokracisë në vend.”