Takim me Anu Prattipati, Presidentja Osmani: Serbia vazhdon me tendencat për destabilizimin e Kosovës!

Serbia vazhdon me tendencat për destabilizimin e Kosovës dhe të të gjithë rajonit përmes veprimeve të mirëkoordinuara me struktura ilegale dhe banda kriminale serbe, tha sot Presidentja Vjosa Osmani në takim me të Ngarkuarën me Punë të Ambasadës Amerikane, Anu Prattipati, ku u diskutua për zhvillimet e fundit në vend, përfshirë situatën e sigurisë në Kosovë dhe në rajon.

“Arrestimi i djeshëm i qytetarëve serbë në Gjakovë dhe në Prizren, të cilët pretendonin se ndodheshin në pelegrinazh, porse, hetimet e deritashme kanë treguar se këto grupe kishin ndërlidhje me strukturat e inteligjencës ushtarake serbe si dhe me anëtarë të grupit terrorist të Banjskës,” ishin temë e diskutimit thekson Presidenca e Republikës së Kosovës përmes njoftimi në rrjetin social Facebook duke saktësuar se Presidentja Osmani theksoi se ky veprim është pjesë e një përpjekjeje të vazhdueshme nga Serbia për destabilizimin e Kosovës, përmes kërcënimeve dhe dhunës. Kjo, sipas Presidentes, përbën një ndërhyrje të papranueshme në sovranitetin shtetëror të Republikës së Kosovës.

“Presidentja Osmani dënoi me vendosmëri këto veprime desabilizuese dhe të papranueshme, duke theksuar se Kosova nuk do të tolerojë asnjë ndërhyrje që rrezikon paqen, rendin kushtetues dhe sigurinë e të gjithë qytetarëve të saj, pa dallim përkatësie. Ajo falenderoi të gjitha institucionet e sigurisë për punën në mbrojtje të vendit dhe diskutoi me znj. Prattipati rreth bashkëpunimit të vazhdueshëm me SHBA në këtë drejtim,” thekson Presidenca e Republikës së Kosovës për takimin në cilin Presidentja Vjosa Osmani e njoftoi znj. Prattipati edhe për hapa të tjerë konkret që do të ndërmarrë, brenda kompetencave të saj kushtetuese, për ta thelluar aleancën strategjike me SHBA-të, dhe për ta mbrojtur interesin e Republikës së Kosovës.