Takim me komandantin e KFOR-it, Kurti: Të shtohet siguria në kufirin me Serbinë!

Pas sulmeve terroriste të 24 shtatorit, Kryeministri i Kosovës, Albin Kurti, e konsideron të nevojshme rritjen e sigurisë nga ana e KFOR-it përgjatë kufirit me Serbinë.

Ky ishte vlerësimi i Albin Kurtit gjatë një takimi që ka zhvilluar me komandantin e KFOR-it, gjeneral Özkan Ulutaş, ku u bisedua për situatën e sigurisë, bashkëpunimin dhe komunikimin e rregullt me KFOR-in.

Duke folur për sulmin terrorist të 24 shtatorit. Kryeministri Kurti tha duke u bazuar në sasinë e madhe të armatimit dhe municionit ushtarak i cili u konfiskua, është prodhuar në Serbi, duhet shtuar sigurinë gjatë kufirit me Serbinë.

“Edhe ushtrimet luftarake të paramilitarëve që kryen terror e vrasje në Banjskë të Zveçanit janë kryer në Serbi. Atje Kosova nuk ka jurisdiksion prandaj nevojitet edhe një hetim ndërkombëtar në Serbi mbi përgatitjet, furnizimin dhe orkestrimin e këtij sulmi,” tha Kurti duke mirëpritur shtimin e numrit të trupave të KFOR-it, në përgjigje të sulmit terrorist nga ana e Serbisë në Kosovë.

Kjo prezencë e shtuar duhet të koncentrohet në ruajtjen e kufirit mes Kosovës dhe Serbisë, prej nga edhe ka hyrë armatimi i Serbisë dhe nga vjen kërcënimi për Kosovën, tha Kurti duke shprehur dhe shqetësimin për qytetarët në veri ndërsa përfundoi:

“Ruajtja e kufirit nënkupton po ashtu mbylljen e rrugëve ilegale, prandaj edhe është i domosdoshëm bashkëpunimi më i madh me Policinë e Kosovës. Në veri të vendit duhet të ofrohen shërbime të rregullta për qytetarët nga institucionet e Kosovës. Prandaj duhet të garantohet liria e lëvizjes.”