Takim me Quintin, Albin Kurti: Hapja e urës së Ibrit nuk është kundër askujt!
Pas takimit të djeshëm me Ambasadorët e vendeve të Quintit, sot Kryeministri i Kosovës, Albin Kurti, e bëri të qartë se Qeveria synon hapjen e urës kryesore mbi lumin Ibër, dhe që ai veprim nuk është kundër askujt.
“Askush nuk mund të thotë që kjo nuk është një gjë e mirë dhe e drejtë, por ne dëshirojmë që edhe të zbatohet ligji, edhe të respektohet liria e lëvizjes, por edhe të kemi paqe e siguri për të gjithë,” tha Albin Kurti pas takimit që zhvilloi me Ambasadorët e shteteve të Quintit dhe Shefit të Zyrës së Bashkimit Evropian në Kosovë ku u diskutuan rreth zhvillimeve të fundit, situata e sigurisë dhe sundimit të ligjit, si dhe informimi dhe koordinimi me partnerët ndërkombëtarë, për bashkërendimin e veprimeve institucionale për hapjen e urës mbi lumin Ibër edhe për makina.
“Hapja e urës i ndihmon të gjithë banorët e asaj zone, pa dallim etnie. I ndihmon si njerëzit në të dyja anët e Ibrit, gjithashtu edhe tregtinë, ekonominë, bashkëpunimin. Para shumë vjetësh, zyrtarë të Bashkimit Evropian i janë referuar hapjes së urës në tërësi për qarkullim si simbol i normalizimit,” tha Kryeministri i Kosovës për hapjen e urës, i vendosur:
“Kundër askujt, por për të gjithë!”
Ndryshe, vendimi për hapjen e Urës mbi Lumin Ibërështë marrë në Kuvendin e Komunës së Mitrovicës së Veriut në prill të vitit 2023, por nuk është zbatuar ende. Dje, Kryeministri i Kosovës edhe para Ambasadorëve të Quintit u shpreh se hapja e kësaj ure mundëson lirinë e plotë të lëvizjes si dhe ndihmon qytetarët në të dy anët e urës, pa dallim, dhe në të njëjtën kohë i shërben zhvillimit të ekonomisë dhe tregut përmes lëvizjes më të lehtë të mallrave dhe kapitalit.
Ndryshe Kryeministri i Kosovës, Albin Kurti, i shoqëruar nga Zv/Kryeministri Besnik Bislimi dhe ministri i Punëve të Brendshme, Xhelal Sveçla, dje takoi Ambasadorin e Shteteve të Bashkuara të Amerikës, Jeffrey Hovenier, Ambasadorin e Mbretërisë së Bashkuar, Jonathan Hargreaves, Ambasadorin e Gjermanisë, Jörn Rohde, Ambasadorin e Francës, Olivier Guérot, Ambasadorin e Italisë, Antonello De Riu dhe Shefin e Zyrës së Bashkimit Evropian në Kosovë, Tomáš Szunyog.
