Takim në Zonën e Demilitarizuar, Presidenti Trump fton liderin e Koresë së Veriut
Presidenti i Shteteve të Bashkuara, Donald Trump ka ftuar liderin e Koresë së Veriut, Kim Jong Un për një takim në Zonën e Demilitarizuar, që ndanë Veriun dhe Jugun në Gadishullin Korean.
“Pas disa takimeve shumë të rëndësishme në Samitin e G20, do të nisem për në Japoni dhe Korenë e Jugut për takim me presidentin Moon. Teksa do të jem atje, nëse Kim do, unë do të takohesha me të në kufi vetëm për t’ia shtrënguar dorën dhe për ta përshëndetur,” bëri të ditur Presidenti Trump përmes rrjetit social Twitter.
Më vonë, Koreja e Veriut tha se oferta e Presidentit Trump për ta takuar Kimin në Zonën e Demilitarizuar është një sugjerim shumë interesant edhe pse u tha se ende nuk kanë pranuar ndonjë kërkesë zyrtare nga Washingtoni për një takim të tillë, raporton RFE.
Duke folur me gazetarët pas përmbylljes së Samitit të G20-ës, Presidenti Trump tha se ai nuk do të kishte asnjë problem” që të kalonte përmes kufirit për në Korenë e Veriut, nëse ai takohet me Kimin.
Nëse Presidenti Trump do të bënte një gjë të tillë, ai do të bëhej presidenti i parë i SHBA-së që viziton Korenë e Veriut.
Presidenti Trump dhe Kim janë takuar dy herë, në përpjekjet e SHBA-së për ta bindur liderin verikorean që të heqë dorë nga programi i armëve bërthamore.
