Takimi Hill-Vuçiç, përparimi i marrëdhënieve Serbi-SHBA, dialogu dhe situata në Kosovë!
Në prag të daljes publike me Kryeministren Ana Brnabiç, Presidenti i Serbisë, Aleksandar Vuçiç, zhvilloi një takim me Ambasadorin e Shteteve të Bashkuara në Beograd, Christopher Hill, ku është diskutuar për përparimin e marrëdhënieve me SHBA, pozitën ndërkombëtare të Serbisë, dialogun dhe situatën në Kosovë.
“Tema qendrore – përparimi i mëtejmë i marrëdhënieve politike dhe ekonomike serbo-amerikane. Natyrisht, kemi biseduar për pozitën ndërkombëtare të Serbisë, si dhe situatën në Kosovë dhe dialogun me Prishtinën,” tha Presidenti i Serbisë, Aleksandar Vuçiç, pas takimit përmes rrjetit social Instagram .
Ndërkohë Kryeministrja e Serbisë, Ana Brnabiç, sot përmes rrjetit social Twitter thekson se letra e ligjvënësve evropianë dhe amerikanë, përmes së cilës ata kërkuan qasje më të ashpër ndaj Serbisë është mirëpritur, pasi sipas saj, kjo është provë e gjallë që homologu i saj kosovar, Albin Kurti, në të vërtetë “gëzon mbështetje dhe inkurajim të plotë për cenimin e paqes dhe stabilitetit në Ballkan”!
Ndryshe, Presidenti i Serbisë, Aleksandar Vuçiç.ka paralajmëruar daljen publike me Kryeministren Brnabiç në orën 18:00, pas letrës së dhjetëra politikanëve nga Evropa dhe Shtetet e Bashkuara që i kanë dërguar zyrtarëve të lartë të Bashkimit Evropian dhe Washingtonit, duke kërkuar që të ndryshohet qasja në raport me Kosovën dhe Serbinë.
