Takimi i Borrell me kryediplomatët, raportet BE-Ballkani Perëndimor

Përfaqësuesi i lartë për Politikë të Jashtme dhe Siguri i Bashkimit Evropian, Josep Borrell, është takuar në Austri me ministrat e Jashtëm të shteteve të Ballkanit Perëndimor ku u diskutuan raportet e BE-së me këto shtete me synimin e përkrahjes për një integrim sa më të shpejtë në strukturat e BE.

“Diskutuam se si të ndërtojmë së bashku një Evropë më të bashkuar,” shprehet Josep Borrell përmes rrjetit social X.

Glad to meet with Foreign Ministers from the Western Balkans, the “Friends of the Western Balkans” group, and the “Danube Region Strategy”.

We discussed how to build a more united Europe together.

Thank you @a_schallenberg for gathering us in Austria these days. pic.twitter.com/yy21SYppdr

— Josep Borrell Fontelles (@JosepBorrellF) June 21, 2024

Në takimin i cili u zhvillua dje ndërsa sot vazhdojnë takimet mes përfaqësuesve të BE-së me ata të Ballkanit Perëndimor, ministrja e Punëve të Jashtme dhe Diasporës e Kosovës, Donika Gërvalla, përmes rrjetit social Facebook bënë të ditur se do të paraqesë qëndrimet e Kosovës për sigurinë në Evropë dhe rajon, por dhe për reformat e ndërmarra në fushën e sundimit të ligjit.

“Do të avokojmë për përshpejtimin e procesit të anëtarësimit në Bashkimin Evropian si dhe nevojës së ndërmarrjes së veprimeve konkrete për ruajtjen e paqes dhe stabilitetit në Ballkanin Perëndimor,” u shpreh Donika Gërvalla.

Ndryshe, para fillimit të takimeve dyditore në Austri, të grupit të “ministrave të Jashtëm të Danubit” dhe “Miqve të Ballkanit Perëndimor”, Bashkimi Evropian njoftoi se Përfaqësuesi i lartë për Politikë të Jashtme dhe Siguri i BE, Josep Borrell, përveç pjesëmarrjes në diskutime të përbashkëta, do të zhvillojë edhe takime dypalëshe me kryediplomatët e Ballkanit.