Komisioni Rithemelimit, Berisha: Të shtunën ratifikohet Kuvendi 11 Dhjetorit
Sot, ashtu siç kishte paralajmëruar, Komisioni i Rithemelimit të Partisë Demokratike zhvilloi mbledhjen e tij të parë në selinë e PD, ku është vendosur që më 18 Dhjetor të zhvillohet referendumi për ratifikimin e Kuvendit të 11 Dhjetorit, pra, shkarkimin e Lulzim Bashës.
Me këtë rast, lideri historik i PD, Sali Berisha, i bëri të qartë Kryeministri Edi Rama se atë e shpëton Referendumi dhe se pas festave të fundvitit do të përballet me protesta të fuqishme.
“Nga të gjitha konferencat e shtypit të karrierës sime, ju garantoj se kjo konferencë është më e veçanta e të gjitha të tjerave të veçanta. Kjo konferencë mbahet sot pas Kuvendit Kombëtar të rithemelimit të PD-së, ngjarje kjo absolutisht unike si monument lirie e grave dhe vajzave, djemve dhe burrave të lirë që në kundërshtim, në përballje me narkoshtetin dhe në nomenklaturën apo më troç me pengkryetarin, por edhe presione të tjera të pandershme ngrihen si vigan në një Kuvend të lirë. Vendosin të rikthejnë fuqishëm pluralizmin politik në Shqipëri. Ju garantoj se pas themelimit të PD-së në vitin 1990 dhe aktivit të saj kombëtar ku Kuvend ishte Kuvendi më perëndimor, në rrafshin e vlerave që sanksionoi në Kushtetutën e PD-së. Jehona e këtij Kuvendi siç ishte unik në llojin e tij, e atyre që duan lirinë dhe i thonë lirisë liri. Por dua t’ju njoftoj me kënaqësi se personalitete nga më të shquarat të krahut konservator në Europë dhe në botë kanë dërguar mesazhe përgëzimi të madh,” tha lideri historik i PD, Sali Berisha pas mbledhjes së Komisionit të Rithemelimit duke u shprehur qartë se këtë javë revolucioni ka për detyrë kryesore, referendumin e anëtarësisë për ratifikimin e Kuvendit të Partisë, të shkarkimit të peng Bashës apo deputetit Basha.
“Kjo është fleta. Një komision u miratua sot këtu për të drejtuar referendumin, bazuar në punën e shkëlqyer që ju patë vetë. Po atij komisioni ju besua drejtimi i referendumit. Do të bëjmë gjithçka që të afrojmë sa më shumë kutitë e votimit me anëtarësi. Ju informoj se ish-kryetari Basha kryer akte që ngjiten në nivelin e krimit elektoral. Ka informuar anëtarësinë në votimin e fundit që të paraqiten në karta, i ka mbledhur kartat dhe nuk ia kthyer. Kjo është plaçkitje, akt që ngjitet në nivelin e krimit elektoral. I garantoj ata që të gjithë do të votojnë, në mënyrë transparente dhe para mediave. Nuk ka njeri që mund të plaçkitë kartat e anëtarësisë, s’e kisha dëgjuar ndonjëherë,” tha Sali Berisha duke shtuar:
Pra, ne presim një rezultat të shkëlqyer më datën 18 sikundër ftoj çdo demokrat atë ditë të firmosë aktin madhor të pushtetit dhe vullnetit të partisë me vlerat e reja të lirisë dhe të dënojë me injorim anti-Kuvendin e Shoqatës Basha-Bardhi. Si një nga turpet më të mëdha të historisë së Evropës dhe njerëzimit në rrugën drejt demokracisë. Pres, anëtarët, drejtuesit dhe deputetët të mos bëhen bashkautorë në një akt të pashembullt anti-pluralizmit në një vendim anti-ligjor të ndërmarrë vetëm e vetëm për karrigen e peng Bashës, aktualisht, deputetit Basha.”
Në fund, lideri historik tha se Kryetarin e ri të PD do ta zgjedhin anëtarët e Partisë Demokratike ndërsa nuk përjashtoi kandidimin e tij në garë.
“Kryetarin e ri do ta zgjedhin anëtarët e PD, mes disa kandidaturave. Padiskutim, do të jem pjesë e garës. Një nga momentet më të veçanta të kësaj konference është rikthimi im, jo si kryetar, por në rrugë e sipër. Jam i vendosur nëse do anëtarësia e PD, por të jemi realist, nëse rikthehem pak këto dy muajt e fundit, ju keni parë edhe në polle po edhe në salla, lakminë e madhe, dëshirën e madhe të shqiptarëve që unë të rikthehem. Cilido që mund të konkurojë është i mirëpritur,” tha lideri historik i Partisë Demokratike, Sali Berisha, duke u përgjigjur në fund mediave se çfarë do ndodhë nëse gjykata nuk do e miratojë statutin e ri të partisë i cili u miratua në Kuvendin e 11 Dhjetorit:
“Pluralizmi, revolucionet nuk dënohen. Revolucioni, nuk ka gjykatës në botë të ndëshkojë pluralizmin!”
