Takimi i krerëve politik me Kurtin, shtyhet seanca për konstituimin e Parlamentit të Kosovës

Pas ftesë së Kryeministrit në detyrë, Albin Kurti, me krerët e partive politike dhe rrethanave të reja që u krijuan me Vendimin e djeshëm të Gjykatës Kushtetuese, dhe para përpjekjes së 38-të për ta konstituar legjislaturën e nëntë të Parlamentit të Kosovës, kryesuesi i seancës Avni Dehari zhvilloi një takim konsultativ me përfaqësuesit e partive parlamentare ku u vendos që të shtyhet seanca për të dielën e 29 Qershorit në orën 11:00.

“Pas aktgjykimit të Gjykatës Kushtetues që e solli dje, sot u mblodhëm me përfaqësuesit e partive për një konsultë paraprake dhe të gjithë ishin të mendimit që seanca të ndërpritet pasi që nesër mbahet takimi i ftuar nga partia më e madhe politike. Do të vazhdojmë me seancë më 29 qershor, në orën 11:00,” tha Avni Dehari duke uruar t’i jepet fund këtij ngërçi politik.

Ndryshe, pas dështimit të 37-të përpjekjeve për konstituimin e legjislaturës së nëntë të Parlamentit të Kosovës, Gjykata Kushtetuese e Kosovës në Aktjgykimin e djeshëm ka konstatuar se seanca e nisur më 15 prill me qëllim të konstituimit të Parlamentit të Kosovës dhe vazhdimi i saj deri tash nuk është zhvilluar në pajtim me Kushtetutën, dhe, duhet të përfundojë më së voni për 30 ditë.

Me publikimin e këtij Aktgjykimi të Gjykatës Kushtetuese të Kosovës, Kryeministri në detyrë, Albin Kurti, ka ftuar për nesër në orën 16:00 krerët e partive politike me qëllim të gjetjes së konsensusit për konstituimin e Parlamentit.