Takimi i së hënës, PDK si i vetmi rival i Vetëvendosjes pranon ftesën e Albin Kurtit
Partia Demokratike e Kosovës, PDK, përveç se institucionale, duke pranuar ftesën e Kryeministrit Albin Kurti për një takim pune ditën e hënë, dëshmoi se është partia e vetme rivale e Lëvizjes Vetëvendosjes dhe është e interesuar përveç se për pushtet edhe për të ardhmen e Kosovës e cila aktualisht është në rrezik.
“Qëndrimi ynë si PDK është i qartë dhe konsistent – Kosova është në krizë në çdo fushë dhe rrugëdalje e vetme janë zgjedhjet e parakohshme parlamentare, të cilat duhet të mbahen sa më parë. Prandaj edhe pjesëmarrja e Kryetarit Krasniqi në këtë takim do të jenë në funksion të diskutimit për mundësinë e caktimit të datës për zgjedhje të reja,” ka sqaruar zëdhënësi i PDK-së, Faton Abdullahu, duke konfirmuar pranimin e ftesës dhe pjesëmarrjen e kryetarit të PDK-së, Memli Krasniqi në këtë takim.
Ndryshe nga Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës të kënaqur me takimet e tyre në bazë, refuzojnë ndërprerjen e këtij ekzaltimi me një darkë pune pavarësisht se në parlament vetëm vjellin kundër pushtetit.
Kryetari i Lidhjes Demokratike të Kosovës, Lumir Abdixhiku, duke e ngatërruar ftesën e Kryeministrit Albin Kurti me ftesën e një Kryetari të Nëndegës së LDK-së nga i cili është zhgënjyer, ftesën e konsideron të vonuar ndërsa akuzoi Kryeministrin për mbjellje të polarizimit ndaj partive politike.
“Në përgjigje të letrës tuaj, e konsideroj të vonuar tani që, pas tre vitesh e gjysmë në pushtet, të tentoni të gjeni një klimë bashkëpunimi kur keni shuar rrënjësisht frymën e bashkëpunimit e kur keni mbjellë polarizim ofendues të skajshëm ndaj të gjitha partive politike tjera në Kosovë dhe përfaqësuesve të tyre,” thotë Abdixhiku duke folur për mbështetje të interesave madhore të Republikës, thuaje këto që flet Kurti janë interesa familjare ndërsa si nxënës i Isa Mustafës, nga idiotizmat e të cilit nuk u shkëput dot, bënë dhe rolin e këshilltarit të Kryeministrit të Kosovës.
“Sa i përket çështjeve të ngritura në letrën tuaj, përkatësisht agjendës legjislative të Kuvendit të Republikës së Kosovës, LDK-ja konsideron se e njëjta diskutohet në Kryesinë e Kuvendit, ku përfaqësuesit tanë politik i japin dhe qëndrimet tona partiake.”
Përgjigje të ngjashme dha edhe Kryetari i Aleancës për Ardhmërinë e Kosovës, Ramush Haradinaj, sikur i ka shkruar e njejta dorë madje ngjajnë si dy pika uji.
“Sa i përket temës së kësaj darke, besoj se kjo bie në përgjegjësinë e shefave të grupeve parlamentare. Z. Besnik Tahiri, i cili e udhëheq grupin tonë parlamentar dhe kolegë tjerë, jam i bindur se do të diskutojnë në frymën kolegiale dhe do te gjejnë një giuhë, që pastaj do të përçohet në Kuvend nga grupet tona parlamentare por zbatim. Konsideroj që kjo temë bie drejtpërdrejt në përgjegjësinë dhe në dijen e tyre,” tha Ramush Haradinaj në përgjigjen e tij duke shprehur gatishmëri për të disktuar për ndonjë temë me interes nacional. Se cili është ky interes nacional nuk dihet, meqë vazhdon të jetë në kokën e atij që e shkroi përgjigjen.
Por, pavarësisht humorit të keq të Abdixhikut dhe Haradinajt, pas ftesës së drejtuar krerëve të partive opozitare për takim dhe diskutim lidhur me agjendën legjislative, Kryeministri i Kosovës, Albin Kurti, tha se është i interesuar që të takohet me të gjithë, ishte i hapur gjithmonë dhe do të vazhdojë të jetë edhe në vitin e fundit të qeverisjes.
“Jam i interesuar që të takohem me të gjithë dhe mendova se është më së miri të takohemi të gjithë së bashku. Unë jam gjithmonë i hapur, i interesuar, i gatshëm. Këtë e kam treguar edhe në të kaluarën dhe do ta tregoj edhe në ditët, javët, muajt në vijim, tash që kemi hyrë në vitin e fundit të mandatit qeverisës,” sqaroi Kryeministri i Kosovës, Albin Kurti.
