Takimi Kurti-Vuçiç, Borrell: I kam thirrur në Bruksel për takim urgjent!
Përfaqësuesi i lartë për Politikë të Jashtme dhe Siguri i Bashkimit Evropian, Josep Borrell, ka bërë të ditur sot se ka thirrur për një takim urgjent në Bruksel, Kryeministrin e Kosovës, Albin Kurti, dhe Presidentin e Serbisë, Aleksandar Vuçiç për të gjetur një rrugëzgjidhje për krizën e krijuar në veri të Kosovës.
“I kam thirrur liderët e Serbisë dhe Kosovës në Bruksel për takime urgjente për të gjetur rrugën e daljes nga kriza aktuale,” shprehet Josep Borrell përmes rrjetit social Twitter duke përfunduar:
“Ne kemi nevojë për deeskalim të menjëhershëm dhe zgjedhje të reja në veri me pjesëmarrjen e serbëve të Kosovës. Kjo është parësore për rajonin dhe BE-në!”
Ndryshe, deri më tani, Kryeministri i Kosovës, Albin Kurti, është shprehur i gatshëm për një takim të nivelit të lartë në Bruksel me qëllim të shtensionimit të situatë ndërsa Presidenti i Serbisë, Aleksandar Vuçiç ka kundërshtuar çdo takim me Kryeministrin Kurti deri sa të lirohen kriminelët serbë të arrestuar nga Policia e Kosovës!
