Takimi me FES, Lëvizja Vetëvendosje kundër themelimit të një Asociacioni mbi baza etnike
Lëvizja Vetëvendosje është kundër themelimit të një Asociacioni dhe çdo marrëveshje tjetër mbi baza etnike. Kështu kanë deklaruar përfaqësuesit e Lëvizjes Vetëvendosje, Alim Rama e Hajrulla Çeku në takim me Drejtorin e Fondacioni Friedrich Ebert, FES, për Kosovën dhe Maqedoni të Veriut, René Schlee.
“Republika e Kosovës ka një nga sistemet më të mira në botë për mbrojtjen e të drejtave të komuniteteve jo shumicë, brenda kornizave ligjore-kushtetuese,”, u shprehën përfaqësuesit e Lëvizjes Vetëvendosje.
Pas takimit, Lëvizja Vetëvendosje shprehet se bashkëpunimi në mes Lëvizjes Vetëvendosje dhe Partisë Social Demokrate të Gjermanisë do të jetë një nga objektivat kryesore gjatë këtij viti, në kuadër të rritjes së koordinimit me familjen Social Demokrate në EU dhe në botë.
Në takim, shprehet Lëvizja Vetëvendosje, janë dakorduar për koordinim e bashkëpunim për vitin 2023, me theks të veçantë në fuqizimin e kapaciteteve organizative, politikën publike dhe qeverisjen lokale.
Gjithashtu, Lëvizja Vetëvendosje ka ftuar FES-in, që të bëjnë një studim krahasimor për respektimin e të drejtave të komuniteteve në Kosovë dhe në vendet e tjera përfshirë Serbinë.
