Takimi me Kurtin, Escobar-Lajçak në kërkim të normalizimit të situatës në veri të Kosovës

Kryeministri i Kosovës, Albin Kurti priti sot në takim me të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar, dhe Përfaqësuesin e Posaçëm të BE-së, Miroslav Lajçak vazhduan përpjekjet për normalizimin e situatës në veri si dhe vazhdimin e procesit të dialogut Kosovë-Serbi.

Pas takimit, Zyra e Kryeministrit përmes një deklarate shprehet se palët diskutuan  për procesin e dialogut ndërmjet Kosovës dhe Serbisë dhe hapat e mëtejmë zhvillimet e fundit në vend dhe çështjet aktuale.

“Në takim kishte dakordim të përbashkët që duhet të hiqen barrikadat në veri të cilat pengojnë lirinë e lëvizjes,” thekson deklarata duke sqaruar se përmes gatishmërisë për takime dhe diskutim, Republika e Kosovës ka dëshmuar në vazhdimësi së është palë konstruktive që angazhohet për arritjen e një marrëveshje ligjërisht e ndërkombëtarisht të obligueshme për normalizimin e plotë të raporteve të ndërsjella me Serbinë me njohjen reciproke në qendër.​

SHBA mbështet planin franko-gjerman, kërkon bisedime për Asociacionin

Pas takimit që zgjati rreth 90 minuta, Escobar foli për përpjekjet që po bëhen për normalizimin e situatës në veri të Kosovës dhe njëkohësisht, mbështetjen që SHBA ia jep planit franko-gjerman, për marrëveshjen gjithëpërfshirëse Kosovë-Serbi

“E kam bërë të qartë në takim, për pritjet tona që kemi për të filluar të  bisedohet për Asociacionin e komunave me shumicë serbe në Kosovë.

E bëra shumë të qartë  dhe shpresoj se do të kemi përpara një rrugë  shumë ë afërt,” tha Escobar duke shtuar:

“Përfaqësuesi Special i BE-së është  këtu dhe shpreha mbështetjen time për përpjekjet e tij për të vazhduar me propozimin franko-gjerman.”

Lajçak: S`bëj me gisht ndaj askujt, por situata është e rëndë

Pas diplomatit amerikan, foli edhe Përfaqësuesi i Posaçëm i BE për dialogun Kosovë-Serbi, Miroslav Lajçak, i cili shtoi se patën diskutime të gjata për gjendjen në vend dhe se po përpiqen  të gjejnë zgjidhje për uljen e tensioneve.

“Po fokusohemi në agjendën për normalizim të marrëdhënieve. Kemi barrikada  në veri të Kosovës dhe kemi situatë të rëndë,” tha Lajçak duke shtuar:

“Prandaj  përfaqësuesi i BE-së, Josep Borrell më ka kërkuar të jem këtu sot.”

Para ardhjes në Prishtinë, Lajçak sqaroi se në Bruksel u zhvillua takimi i ministrave të Punëve të Jashtme të vendeve anëtare të BE-së dhe ka pasur shumë shqetësime për situatën në Kosovë.

“Për këtë arsye do të jem nesër në Beograd,” tha Lajçak duke saktësuar se me vete do ketë informacionet e fundit nga terreni dhe do të bisedojë atje për mundësinë se si gjendja t’i kthehet normalitetit.

“Kemi pasur diskutim të gjatë me Kryeministrin Kurti për një sërë çështjesh, por nuk do t’i them detajet,” tha Lajçak duke u shprehur qartë se tensionet nuk e ndihmojnë askënd dhe se vetë nuk është i kënaqur me gjendjen në veri.

Ai tha  se nuk dëshiron të bëjë me gisht ndaj askujt- “por situata është e rëndë”.

I pyetur nëse është biseduar për heqjen e barrikadave nga dy rrugët kryesore në veri të Kosovës, të bllokuara nga serbët lokalë, Lajçak tha se për këto çështje do të bsiedojë me KFOR-in dhe EULEX-in.

“Unë jam diplomat dhe e di se ka mënyra shumë më të mira për ta zgjidhur këtë çështjen e barrikadave, sesa me buldozerë”.

Lajçak tha se ka pasur shumë për të diskutuar se cila është situata dhe cila do të jetë zgjidhja, prandaj nga këtu sot, nesër do të jetë në Beograd.

 “Ne do të përpiqemi të identifikojmë mënyrat për uljen e përshkallëzimit dhe t’i rikthehemi jetës normale, në mënyrë që të mund të vazhdojmë drejt dialogut normal”.

Lajçak deklaroi se ka pasur një bisedë të gjatë me kryeministrin Kurti për një sërë çështjesh, por përsëriti se nuk do të flasë për detaje.

Përfaqësuesi Special i BE tha se për të mësuar më shumë mbi situatën e sigurisë në Kosovë,  do të takojë sonte komandatin e KFOR-it dhe atë të EULEX-it.

“Më vone, sonte, do të takohem edhe me komandantin e KFOR-it dhe EULEX-it. “Kjo për t’u përpjekur të gjejmë zgjidhjen e duhur sepse nuk mendoj se mund të presim derisa diçka e keqe të ndodhë”.

Ndryshe, në takimin me kryeministrin Albin Kurti, i dërguari i posaçëm i Shteteve të Bashkuara për Ballkanin Perëndimor, Gabriel Escobar, i cili shoqërohej nga Ambasadori i SHBA-ve në Kosovë, Jeffrey Hovenier ndërsa Përfaqësuesi i Posaçëm të Bashkimit Evropian për Dialogun Kosovë-Serbi, Miroslav Lajçak ishte i shoqëruar nga Ambasadori i BE-së Tomas Szunyog.

I dërguari i posaçëm i Shteteve të Bashkuara për Ballkanin Perëndimor, Gabriel Escobar, po qëndron në Kosovë që nga e hëna ku dhe zhvilloi takime me të gjithë liderët institucionalë e politik të vendit, kurse Përfaqësuesi Special i BE-së, Miroslav Lajçak, ka ardhur sot në Prishtinë, ardhje të cilën e paralajmëroi Përfaqësuesi i Lartë i BE-së për Politikë të Jashtme e Siguri, Josep Borrell, i cili pas tensionimit të situatës në veriun e Kosovës, tha se do ta dërgojë atë në rajon.