Takimi me liderët, Presidentja e Kosovës: Nuk ka qëndrim unik për mandatarin e dytë!

Presidentja e Kosovës, Vjosa Osmani, tha se në takimin e sotëm me liderët e partive politike nuk kishte qëndrim unik nëse ka apo jo mundësi për propozim të mandatarit të dytë për krijimin e qeverisë së re dhe as për miratimin e buxhetit 2026.

Konsultimet me liderët e partive politike do të vazhdojë, tha ajo, dhe kushdo që ka gatishmëri për të parë përfundimisht se a ka mundësi për caktimin e mandatarit të ri apo jo do t’i  presë sërish në takim.

“Diskutuam në qoftë se dikush nga partitë politike që ishin të ulura rreth asaj tavoline e kanë shumicën e nevojshme për të krijuar qeveri apo jo. Besoj i keni dëgjuar përfaqësuesit e partive politike rreth qëndrimeve të tyre. Ata disa kishin qëndrime se nuk mund të krijojnë shumicë, e kishte qëndrime se dëshirojnë të takohemi sërish për të parë mundësinë e një mandatari të ri,” tha Vjosa Osmani duke bërë të ditur se sipas Kushtetutës, institucioni i Presidencës i ka 10 ditë deri në marrjen e vendimit nëse mandatohet mandatari i dytë apo jo.

“Ky afat skadon më 5 nëntor. Deri më atë datë unë do të komunikoj sërish me kryetarët e partive, jo domosdoshmërish do të mbajë takime individuale me secilin, sepse ka disa që mendojnë se është ezauruar çdo mundësi, por gjithsesi do të jem në kontakt me ta. Kushdo që ka gatishmëri për të parë përfundimisht a ka mundësi për caktimin e mandatarit të ri apo jo unë do t’i  presë në takim.”

Aktgjykimet e Gjykatës Kushtetuese, rikujtoi ajo e kanë lënë në diskrecion të presidentes çështjen e mandatarit të dytë, dhe ky diskrecion do të shfrytëzohet përgjatë ditëve në vijim para vendimit final, më së largu deri më 5 nëntor.

“Tani a do të ketë propozim për mandatar tjetër është çështje e partive politike të përfaqësuara në kuvend sepse siç ju thashë kishte qëndrime jo unike. Nuk kishte unanimitet të plotë rreth asaj nëse mund të ketë mandatar tjetër apo jo,” tha Presidentja e Kosovës duke theksuar se Kryeministri në detyrë dhe lideri i Lëvizjes Vetëvendosje, Albin Kurti, i ka kërkuar që të më takoj edhe një herë para se të skadojë afati 10 ditor për caktim të mandatarit të dytë.

“Pas konsultimeve që do t’i ketë brenda partisë politike që e përfaqëson do të vijë me propozim apo jo, është çështje e tyre, mirëpo ne e kemi detyrim kushtetues që t’i respektojmë ato afate. Pastaj nëse ka propozim për mandatar të ri, atëherë hyjnë në shprehje dispozitat e reja kushtetuese dhe afate të reja, por nëse nuk ka qeveri dihen edhe ato pastaj janë 30 deri 40 ditë për mbajtjen e zgjedhjeve”, tha Osmani.

Ajo tha se çështje tjetër që e ka ngritur ishte nëse mund të gjejë një rrugë përpara me dakordim të partive politike për procedim të buxhetit dhe Planit të Rritjes, një instrument i BE-së, që rikujtoj presidentja, nëpërmjet të cilës Kosovës i jepen mbi 800 milionë euro.

“Sa më shumë të kemi vonesa ne mund të humbasim qasje në fonde. Ai ratifikim kërkon të 2/3-tat në kuvend. Nuk kishte gatishmëri nga një numër i madh i të pranishme për buxhetin, i cili sot ishte miratuar nga qeveria, megjithatë unë propozova që të shikojmë mundësi tjera kushtetuese, dhe një prej të cilave ishte zgjatja e buxhetit të vjetër, që së paku deri më 31 mars 2026 qytetarët tanë të mos të përballen me një situatë ku nuk kanë paga dhe nuk kanë mirëqenie. Kjo të ishte një situatë e paprecedent dhe e rëndë sepse një numër i madh i qytetarëve tanë varen nga paga që e marrin në fund të muajit. Në qoftë se pastaj pas këtyre zgjedhjeve potenciale nuk ka institucione shumë shpejt atëherë mund të mbesim pa buxhet në tërësi,” tha Presidentja e Kosovës, Vjosa Osmani, duke theksuar se propozimi i saj ishte të gjejnë rrugë përpara ndërsa përfundoi:

“Kishte shqetësim rreth procedurave, por propozimi im ishte sipas nenit 79 të Kushtetutës që nëse ata nuk dakordohen, këto të iniciohen si nisma legjislative nga qeveria, atëherë atë detyrim ta marrë unë dhe si presidente t’i procedojë edhe zgjatjet buxhetore edhe Planin e Rritjes, si ligje në kuvend, meqenëse nuk i kam kompetencat e kufizuara dhe një gjë e tillë njihet si e drejtë e presidentes sipas nenit 79-të të Kushtetutës.”