Takimi me përfaqësues të BB, Sejko: Tensioni gjeopolitik do godasë edhe ekonominë shqiptare

Guvernatori i Bankës së Shqipërisë, Gent Sejko, zhvilloi sot një takim me delegacionin e Bankës Botërore, të kryesuar nga Mario Guadamillas, Menaxher pranë Bankës Botërore për Evropën dhe Rajonin.

Takimi u zhvillua në kuadër të Misionit të Sektorit Financiar, me një fokus të veçantë në zhvillimet në këtë sektor dhe aksesin në financë.

Gjatë takimit, Guvernatori Sejko vlerësoi se tensioni gjeopolitik do të japë goditje mbi ekonominë shqiptare, megjithatë ajo do të vijojë të rritet gjatë vitit 2022 e në vazhdim. Ai shtoi se inflacioni ka shfaqur tendencë rritëse gjatë tremujorit të parë të vitit dhe parashikimet e Bankës së Shqipërisë vlerësojnë se ai do të qëndrojë mbi objektiv gjatë pjesës më të madhe të dy viteve në vijim. Në këtë kuadër, Sejko shpjegoi vendimin e Bankës së Shqipërisë për të ulur stimulin monetar në ekonomi, duke rritur normën bazë të interesit në nivelin 1%.

Nga ana tjetër, Guvernatori theksoi se veprimtaria e sektorit bankar po zhvillohet në mënyrë normale, me tregues të mirë financiarë, bilance likuide e të shëndetshme, tendencë rritëse të kreditimit dhe rënie të kredive me probleme.

Përfaqësuesit e Bankës Botërore vlerësuan kontributin e Bankës së Shqipërisë në ruajtjen e stabilitetit financiar dhe mbështetjen e zhvillimit ekonomik të vendit. Sipas njoftimit zyrtar të Bankës së Shqipërisë, Guadamillas përgëzoi Guvernatorin Sejko dhe institucionin që ai drejton për angazhimin e shprehur gjatë zbatimit të projekteve të përbashkëta, të cilat kanë rezultuar mjaft të suksesshme.

Nga ana e tij, Guvernatori Sejko falënderoi përfaqësuesit e Bankës Botërore për asistencën teknike ofruar Bankës së Shqipërisë, kryesisht në fushën e ndërhyrjes së jashtëzakonshme dhe përfshirjes financiare. Falë kësaj asistence, Banka e Shqipërisë ka ngritur një kuadër të plotë e funksional për ndërhyrjen e jashtëzakonshme në banka, çka e vendos në pararojë të vendeve të rajonit. Sa i përket përfshirjes financiare, mbështetja ka qenë e përqendruar kryesisht në shërbimet e pagesave dhe plotësimin e kuadrit rregullator përkatës, si dhe në hartimin e strategjisë së edukimit financiar.

Në përfundim, Guvernatori Sejko dhe përfaqësuesit e Bankës Botërore diskutuan mbi vazhdimësinë e projekteve të ndërmarra dhe asistencës teknike të nevojshme për mbylljen me sukses të tyre./Monitor/