Takimi me Presidentin/ Prova tronditëse, Basha: Qëllimi i Edi Ramës, jo Reforma por kapja e Drejtësisë!
Pas takimit me Presidentin e Republikës, lideri i Opozitës së Bashkuar, Lulzim Basha bëri të ditur se ishin njohur me prova tronditëse të ndërhyrjes flagrante të Kryeministrit Edi Rama në procesin e Reformës në Drejtësi, konkretisht në emërimin e gjyqtarëve të Gjykatës Kushtetuese ndërsa saktësoi se cilat janë kërkesat dhe strategjia e opozitës.
“Gjatë takimit me Presidentin Meta u njohëm me prova tronditëse të asaj që kemi ditur dhe thënë edhe më përpara, të ndërhyrjes flagrante të kryeministrit të vendit në procesin e reformës në drejtësi dhe, konkretisht, në procesin e emërimit të gjyqtarëve në Gjykatën Kushtetuese.
Këto prova dhe fakte tronditëse vërtetojnë se qëllimi i vetëm i këtij kryeministri dhe kësaj qeverie është jo zbatimi i reformës në drejtësi, por kapja e institucioneve të drejtësisë dhe, në veçanti, kapja e Gjykatës Kushtetuese.”
Partia Demokratike dhe Aleatët, tha Lulzim Basha, e kanë konsideruar këtë prej fillimit një grusht kushtetues, por, përtej kësaj, edhe një provë më shumë se me këtë qeveri reforma në drejtësi është e rrezikuar, drejtësia e pavarur që nuk mbron, por ndëshkon politikanët e korruptuar dhe të lidhur me krimin, mbetet një iluzion. “E kemi parë këtë në rastin e Saimir Tahirit, e kemi parë në rastin e hetimeve të ndaluara dhe të sabotuara për manipulimin zgjedhor në dosjen e “184” dhe në dosjen “339”; e kemi parë në rastin e varrosjes së aferave të tmerrshme korruptive të kësaj qeverie.”
Lideri i opozitës me këtë rast sqaroi se Partia Demokratike dhe Opozita e Bashkuar qëndrojnë për një reformë në drejtësi sipas Kushtetutës.
“Ne kërkojmë vënien në funksionim të Gjykatës Kushtetuese, të Gjykatës së Lartë, të SPAK dhe BKH –së sipas Kushtetutës dhe jo sipas planeve, anktheve dhe problemeve korruptive të qeverisjes aktuale. Çështja e dytë që kemi diskutuar është domosdoshmëria për zgjidhjen e krizës politike,” tha Basha duke shtuar se prej më shumë se 3 muajsh kjo detyrë është shtruar edhe nga institucionet ndërkombëtare, në veçanti, nga fuqia më e madhe europiane, Gjermania, përmes mocionit të përbashkët të Bundestagut. Është shtruar, po kështu, edhe nga partnerët tanë strategjikë.
Prej më shumë se 2 muajsh opozita ka shprehur gatishmërinë e saj për të kontribuar përmes një dialogu transparent për një reformë zgjedhore dhe zbatimin e kësaj reforme, siç e kërkon Bundestagu.
Prej më shumë se 4 muajsh Edi Rama ka refuzuar dialogun dhe ndërmjetësimin nderkombëtar, të ofruar, të paktën, në 4 raste nga institucionet ndërkombëtare, në tentativë për të mbuluar krizën e thellë politike, ku ndodhet vendi.
“Shtyrja e afatit të komisionit të Reformës Zgjedhore është një tjetër përpjekje për t’i hedhur hi syve shqiptarëve dhe faktorit ndërkombëtar. Opozita e Bashkuar as nuk ka kërkuar, as nuk kërkon dhe as nuk mbështet shtyrjen për në kalendat greke të reformës zgjedhore.”
Dhe jo vetëm kaq! Javën e ardhshme, tha Kryetari i PD, Opozita e Bashkuar do të konkretizojë produktin e saj:
“Ky është dokument strategjik për reformën zgjedhore, në amendamente në të gjitha ligjet dhe ndërhyrjet e nevojshme në këto ligje, pra propozimin e plotë për reformën zgjedhore, ndërkohë që, nga ana tjetër, kemi patur refuzim të dialogut, kushtëzim të dialogut dhe sabotim të reformës zgjedhore.”
Refuzimi i dialogut për Opozitën e Bashkuar është një film i parë dhe i stërfarë, Qeveria vepron në kundërshtim me interesin e shqiptarëve dhe, pastaj, përpiqet t’ia hedhë fajin opozitës, por opozita nuk mund ta pranojë këtë, për opozitën, tha ai, propozimet do të jenë gati jo më vonë sesa fillimi i dhjetorit.
“Për opozitën dhe për shqiptarët nuk ka dhe nuk mund të ketë asnjë alibi për të vonuar zgjedhjet e parakohshme parlamentare dhe zgjedhjet kushtetuese vendore në të njëjtën ditë si rrugëdalja e vetme nga kriza.
Nuk i mungon Shqipërisë dhe shqiptarëve asgjë krahasuar me Maqedoninë e Veriut, e cila u viktimizua për shkak të dështimit të Edi Ramës me negociatat dhe, prapë se prapë, lidershipi politik atje mori përgjegjësitë që i takojnë. Vendi shkon drejt zgjedhjeve parlamentare me një qeveri kujdestare për të garantuar votën dhe për të garantuar një proces normal politik. “
Në fund, kryetari i Partisë Demokratike, Lulzim Basha u shpreh se Opozita e Bashkuar do të vazhdojë të insistojë në këtë kërkesë të pandryshueshme të opozitës duke ndërmarrë të gjitha hapat e nevojshme si opozitë:
“Duke u bërë thirrje edhe qytetarëve shqiptarë, të cilët janë në shumicë numerike për zgjedhje të parakohshme parlamentare, për zgjidhjen e kësaj krize, që po shkatërron ekonominë e vendit, po shkatërron shpresën e shqiptarëve për të marrë, së bashku, të gjithë hapat e nevojshëm, që i takojnë një shoqërie të civilizuar, nëse përballet me një qeveri autokrate, të paligjshme, që pengon shprehjen e vullnetit të popullit, përmes zgjedhjeve të lira dhe të ndershme.”
