Taksa 100 për qind, Serbia ka humbur 500 milionë euro!

Kosova ka vendosur taksën doganore prej 100 për qind për mallrat e Serbisë dhe të Bosnje e Hercegovinës më 21 nëntor të vitit të kaluar. Nga atëherë e deri më tani është deklaruar se Serbia ka humbur miliona euro për shkak të takës.

Drejtori i Zyrës Serbe për Kosovën pranë Qeverisë së Serbisë, Marko Gjuriç tha sot se vendosja e taksës nga Qeveria e Kosovës, i ka kushtuar ekonomisë së Serbisë dëme prej më shumë se 500 milionë euro në vit.

Gjuriç reagoi sot pas deklaratës së Presidentit të Kosovës, Hashim Thaçi, se një dëm i tillë arrin në vetëm disa miliona është e pavërtetë.

“Përpjekjet për të zvogëluar dëmin për të pakësuar presionin që Prishtina vuan nga ana e bashkësisë ndërkombëtare, nuk janë asgjë më shumë se një shtrembërim i realitetit”.

Ndryshe, presidenti Hashim Thaçi ka deklaruar se vendosja e taksës ndaj produkteve serbe është vendim i drejtë dhe legjitim nga institucionet e Kosovës. Gjithsesi, ai kishte pranuar se këto produkte po hyjnë në Kosovë edhe përmes rrugëve tjera.

“Presidenti i Serbisë, Aleksandër Vuçiç nuk është shumë i shqetësuar për vendosjen e taksës sepse mallrat serbe po futen në Kosovë dhe nga Mali i Zi, Shqipëria, Maqedonia por edhe në formë të kontrabandës në për fat të keq,” tha Thaçi për mediat në Kosovë, pas përfundimit të Samitit të Berlinit.

“Ai humb disa miliona euro, por ka fituar një reputacion në kuptimin e imazhit se si Serbisë gjoja po i ndodh një padrejtësi – sillen si viktima. Taksa është vendim i drejt dhe duhet të mbetet në fuqi. Unë e kam përkrahur këtë ide nga fillimi. As s’kam bërë thirrje për pezullim, as për heqje – është gënjeshtër e kulluar,” tha Hashim Thaçi.

Ndërsa vendimi për taksën në Kosovë prodhoi efekte të ndryshme, në Komunat më shumicë serbe, qytetarët e komunitetit serb të pakënaqur me këtë vendim organizuan protesta.

Pas këtyre protestave Kryetarët e Komunave më shumicë serbe kanë dhënë dorëheqje të cilat ende nuk janë pranuar nga Qeveria e Kosovës , nën arsyetimin se janë të paligjshme sepse përmbajnë mbishkrimin ‘Kosova e Metohija’.

Taksa solli në Kosovë dhe në Serbi,  Komisionerin Hahn, i cili pas këtyre takimeve  ‘shuajti’ shpresat për viza në 2018-tën.

Taksa 100 për qind e vendosur për produktet e Serbisë dhe Bosnjës paralizoi procesin e dialogut, sepse qeveria e Serbisë e vendosi kusht largimin e taksës për vazhdimin e dialogut.

Kujtojmë se më 9 Nëntor 2018, Qeveria e Kosovës vendosi masën 10 për qind për produktet e Serbisë dhe Bosnje Hercegovinës duke përjashtuar këtu brendet ndërkombëtare.

Mirëpo kjo taksë nuk mbeti e tillë, dhe pikërisht një ditë pas dështimit të Kosovës për anëtarësim në organizatën INTERPOL, më 21 nëntor të vitit të kaluar, kjo taksë u rrit në 100 për qind.

Përveç kësaj ky vendim parashikonte edhe largimin  dhe moslejimin e hyrjes në treg të produkteve me  etiketën “Kosova dhe Metohija”, gjë e cila është duke vazhduar edhe tani. Mirëpo më vonë taksa 100% u vendos edhe për brendet ndërkombëtare./Monitor/