Taksa për mallërat serbe/ Kosovë, importi është zhvendosur nga Serbia tek Shqipëria, Italia…
Me vendosjen e taksës 100 për qind për mallrat nga Serbia dhe Bosnjë e Hercegovina, importi i mallrave serbe dhe boshnjake, ka rënie të madhe. Sipas të dhënave të Doganës së Kosovës, importi në muajin mars ishte rreth 900 mijë euro dhe ky import është zhvendosur nga Serbia dhe Bosnja e Hercegovina me importet nga Shqipëria, Italia, Maqedonia dhe Bullgaria.
“Nëse marrim një krahasim, nëse para masës mbrojtëse kemi pas import prej 1.2 deri në 1.4 milionë brenda një dite, tani në këta muaj kemi import vetëm 900 mijë euro. Pra, ende nuk është plotësuar asnjë ditë që ka qenë më herët e importit të produkteve të Serbisë dhe të Bosnjës”, tha
zëdhënësi i Doganës së Kosovës, Adriatik Stavileci, duke sqaruar edhe zhvendosjen e importit nga Serbia dhe Bosnja e Hercegovina me import nga Shqipëria, Italia, Maqedonia dhe Bullgaria.
“Ne kemi pa zhvendosje të importit, se deri sot, dikur disa industri kryesore që kanë qenë, që kanë dominuar tregun e Kosovës, industria ushqimore dhe industria e ndërtimit me produkte të Serbisë dhe Bosnjës, tani kjo ka lëvizë, tani Kosova blen ushqime apo materiale ndërtimore kryesisht nga vendet e tjera. Ne kemi pa lëvizje të importit tek produktet ushqimore duke filluar nga Italia, Shqipëria, Maqedonia dhe Bullgaria, të cilat tentojnë me e zëvendësuar këtë hendekun i cili është kriju pas masës mbrojtëse.”
Stavileci ka sqaruar me këtë rast se nuk kemi ndalesë apo embargo ndaj Serbisë apo Bosnjes por vetëm masë mbrojtëse, që do të thotë se secili produkt, nëse i plotësojnë kushtet ligjore për import mund të importohen kundrejt pagesës prej 100 për qind të tatimit.
Ndërkohë për rrezikun e paralajmëruar të kontrabandimit të mallërave serbe, zëdhënësi i Doganës së Kosovës, Adriatik Stavileci, sqaron për Ekonomia Online, se kontrabanda me mallra nuk është në rritje pas vendosjes së taksës, por sipas tij, është nxitur kontrabandimi me mallra me vlera të ulëta, përfshirë ato ushqimore.
“Nëse i shikojmë statistikat vitin e kaluar dhe këtë vit vërejmë se pak a shumë është e njëjta situatë me raste të kontrabandimit të mallrave. Për këtë arsye, dogana nuk ka vërejt indikacione që ka kontrabandim të shtuar, në masë të madhe të produkteve prej Serbisë, por çfarë kemi vërejt për dallim nga vitet tjera është që tani kontrabandimi nëse dikur më herët është bë me mallrat të cilat kanë akcizë apo taksa më shumë, tani kontrabandimi ka kaluar në mallra me vlera të ulëta, kryesisht mund të jenë edhe gjëra ushqimore.”
Ndonëse veriu i Kosovës përflitet si burimi kryesor i kësaj kontrabande, Stavileci thotë se nuk duhet të ndahet Kosova në pjesë se ku mund të kontrabandohet më shumë, por sipas tij, veriu qëndron të jetë edhe problem politik.
“Po, ka raste të kontrabandës, por nuk duhet të ndahet Kosova në pjesë se kah kontrabandohet më shumë. Normalisht ne e kemi atje edhe një problem politik, por sidoqoftë sa i përket kontrabandës ka më shumë raste në pjesën veriore, apo ka më shumë tentime për kontrabandim, mirëpo nuk do të thotë që nuk kemi edhe në pjesë e Dheut të Bardhë, nuk do të thotë që nuk kemi edhe në pjesën e Vërmicës,” tha Adriatik Stavileci ndërsa foli edhe për 10 raste që janë shënuar në tre mujorin e parë të këtij viti, dhe janë proceduar:
“Kontrabanda vetëm në tre mujorin e parë të këtij viti, krahasuar me vitin e kaluar në pjesën veriore kemi pas 10 kundërvajtje vitin e kaluar dhe 11 kemi pas këtë vit. Pra nuk paraqet ndonjë rritje, por çka ka ndryshuar është tek llojet e produkteve të cilat janë kontrabandu.”
Ndryshe, Qeveria e Kosovës me 21 nëntor të vitit të kaluar ka marrë vendim për rritjen e taksës nga 10 në 100 për qind për mallrat e importuara nga Serbia dhe Bosnje Hercegovina. Ky vendim ka nxitur reagime të ashpra nga Beogradi dhe BE të cilat vazhdojnë ti bëjnë presion Qeverisë së Kosovës për anulimin e kësaj takse, duke e hedhur në terrenin politik, dhe duke vetëquajtur si bllokuese të dialogut Kosovë-Serbi .
