Taksa të hiqet, Grenell: Serbia të ndërpresë fushatën kundër pavarësisë së Kosovës!

Përfaqësuesi special i Presidentit të SHBA për dialogun Kosovë-Serbi, Ambasadori Richard Grenell, pasi takoi mandatarin për formimin e Qeverisë së re të Kosovës, Albin Kurti, tha se taksa 100% ndaj Serbisë duhet të hiqet dhe kjo e fundit duhet të ndërpresë fushatën kundër pavarësisë së Kosovës.

Me këtë rast ai e bëri të qartë se nuk është i interesuar të përfshihet në çështjen e formimit të qeverisë, por tha se i ka thënë Albin Kurtit që edhe shtetet tjera kanë pasur probleme rreth krijimit të koalicioneve të panatyrshme.

“Çështja  e formimit të qeverisë nuk është çështje e imja dhe nuk jam i interesuar të  përfshihem, gjithçka që po shikojmë nga anash. Do i them dy gjëra, i thash z. Kurti  se shtetet si Britania e Madhe dhe Gjermania  kanë pasur probleme për krijimin e koalicioneve të panatyrshme për të formuar qeverinë, ju thash se ne po shikojmë dhe se ne nuk kemi ‘ndonjë qen në këtë betejë’  dhe vetëm po shikojmë se çfarë po ndodh dhe i inkurajojmë të ndjekin sundimin e ligjit si çdokush tjetër, dhe ta dinë që edhe shtetet e tjera kanë pasur problem  për krijimin e koalicioneve të panatyrshme.”

Ambasadori Grenell tha se edhe gjatë kësaj vizite po përqëndrohet në zhvillimin ekonomik, për çfarë nuk e fshehi bindjen që kishte. 

“Po provoj të injoroj betejën politike dhe të përqendrohem në zhvillimin ekonomik. Për shkak të kësaj,  i kërkova z. Kurti dhe do i kërkoj çdo udhëheqësi politik këtu që është shumë e rëndësishme se nëse dëshirojmë të ecim përpara, nevojitet zhvillimi ekonomik  dhe taksa 100% të hiqet, është diçka që duhet të hiqet, po ashtu edhe fushata e Serbisë  duhet gjithashtu të ndalet. Unë mendoj se që të dyja duhet të ndodhin në mënyrë që bizneset të rriten, të krijohen vende të punës për të rinjtë. Unë do ta përçoj  të njëjtin mesazh edhe në Beograd . Dëshiroj që ne të ecim përpara dhe të ndihmojmë familjet e reja dhe të rinjtë që të kenë punë me paga më të mira dhe një situatë me ekonomi në rritje. Ky ishte mesazhi im që e përçova  këtu dhe do jetë mesazhi i njëjtë që do e përçoj në Serbi.”

Ndryshe, Përfaqësuesi special i Presidentit të SHBA për dialogun Kosovë-Serbi, Ambasadori Richard Grenell, ka arritur në Kosovë dje, ku takuar Presidentin e Kosovës, Hashim Thaçi, ndërsa sot ka zhvilluar takime me Albin Kurtin dhe Isa Mustafën.