Taksa të ulëta/ Premtimi, Basha: Do heqim taksën e “Rrugës së Kombit”!

Kryetari i Partisë Demokratike, Lulzim Basha, gjatë vizitës në Paskuqan ka takuar edhe përfaqësuesit e biznesit të cilët janë ankuar për politikën represive fiskale dhe gjendjen e mjeruar në këtë vend ku biznesi po falimenton.

Me këtë rast, duke i ftuar që të bëhen pjesë e ndryshimit duke marrë pjesë në Protestën e Opozitës së Bashkuar më 16 Mars, Lulzim Basha, tha se na pret një qeveri me taksa të ulëta ndërsa premtoi se do ta heq taksën e Rrugës së Kombit.

“Kam tre anëtarë në emigracion. Kam hapur një biznes dhe jemi drejt falimentimit. I bëj thirrje nipit të Spiro Kolekës, të mos tallet me nervat e kuksianëve, ta heqë taksën e “Rrugës së Kombit”. Vetëm po falimentoj. Nuk punësoj dot punëtorë. Nuk kam. Edi Rama mos na presë me 16 Mars, të ikë,” tha njëri prej banorëve të Paskuqanit duke rrëfyer pë vështirësitë gjithnjë e më të mëdha me biznesin që ai drejton.

Duke sqaruar banorët se kjo qeveri nuk e ka lidhur fatin me shqiptarët, por me kriminelët, lideri i opozitës bëri premtimin e shumëpritur:

“Ju jap fjalën se do të jem në krahun tuaj deri sa ta fitojmë këtë betejë. Na pret një qeveri me taksa të ulëta, me mundësi punësimi për të gjithë shqiptarët. Sepse Shqipëria i ka mundësitë të ulë taksat. Ne e kemi planin. Uljen e çmimit të naftës me 300 leke, uljen e taksës së biznesit të vogël 0.5% e xhiros në vit dhe asnjë taksë tjetër, as lokale as qendrore. Të gjitha do të shkojnë për pushtetin lokal. Do ta heqim taksën e “Rrugës së Kombit”. Duhet larguar kjo qeveri. Kjo qeveri nuk e ka lidhur fatin me shqiptarët, por me kriminelët.”