Tatimet autorizojnë drejtoritë rajonale të mbledhin borxhin ndaj biznesit
Drejtoria e përgjithshme e Tatimeve po tenton të lehtësojë arkëtimin e borxhit që bizneset kanë ndaj këtij institucioni. Në fund të vitit 2019 këto detyrime arritën vlerën 117 miliardë lekë ose 950 milionë euro.
DPT njoftoi sot se, arkëtimi i detyrimeve të prapambetura nuk do të jetë eksluzivitet i administratës qendrore në Tiranë, por edhe drejtorive rajonale.
Kështu tatimpaguesit e regjistruar në DRT Tiranë , DRT Durrës, DRT Elbasan , DRT Korçë, për çdo problematikë lidhur me çështje të detyrimeve tatimore të papaguara, të paraqesin kërkesë pranë Drejtorisë së Mbledhjes së Detyrimeve Tatimore Rajoni Qendror me qendër pranë Drejtorisë Rajonale Tatimore Tiranë, ose nëpërmjet e-filling për shlyerjen e detyrimeve.
Tatimpaguesit e regjistruar në DRT Berat, DRT Gjirokastër, DRT Vlorë , DRT Sarandë, DRT Fier, për çdo problematikë lidhur me çështje të detyrimeve tatimore të papaguara, të paraqesin kërkesë pranë Drejtorisë së Mbledhjes së Detyrimeve Tatimore Rajoni Jugor me qendër pranë Drejtorisë Rajonale Tatimore Fier.
Tatimpaguesit e regjistruar në DRT Lezhë, DRT Shkodër, DRT Kukës, DRT Dibër për çdo problematikë lidhur me çështje të detyrimeve tatimore të papaguara, të paraqesin kërkesë pranë Drejtorisë së Mbledhjes së Detyrimeve Tatimore Rajoni Verior me qendër pranë Drejtorisë Rajonale Tatimore Shkodër.
Tatimpaguesit e regjistruar në Drejtorinë Tatimpaguesit e Mëdhenj, për çdo problematikë lidhur me çështje të detyrimeve tatimore të papaguara, të paraqesin kërkesë pranë Drejtorisë së Mbledhjes së Detyrimeve Tatimore me qendër pranë Drejtorisë Tatimpaguesit e Mëdhenj në ose nёpёrmjet e-filling.
Borxhi i bizneseve ka patur një ecuri kumulative duke arritur në gati 1 miliardë euro.
Në stokun e borxhit të ndarë sipas llojit të tatimit, TVSH zë peshën më të madhe ne stokun me borxhit me 35% në vlerë 40,4 mld leke, e ndjekur nga Tatim Fitimi me 27% në vlerë 31,6 mld lekë, zëri Të Tjera me 24% ne vlere 27,9 mld leke, Sigurimet Shoqërore & Shëndetësore me 13% në vlerë 15,1 mld lekë dhe TAP me 2% në vlerë 1,9 mld lekë./Monitor/
