Tatimorët u telefonojnë bizneseve të paguajnë tatim fitimin shtesë për 2019-n, prilli muaj i vështirë për taksat

Me afrimin e 31 marsit, ditët e fundit janë shtuar telefonatat e tatimorëve drejt bizneseve, ku u kërkohet që të paguhet diferenca e papaguar e tatim fitimit të vitit 2019 (për ata që rezultojnë me diferencë pozitive), sipas raportimit të ekonomistëve të subjekteve të ndryshme. Kjo diferencë është e lidhur me Pagesën e fitimit për periudhe 19 A, që vjen nga deklarata vjetore të tatimit fitimit.

Ndonëse afati i dorëzimit të bilancit u shty në datën 31 korrik, deklarata e tatim fitimit, që dorëzohej bashkë me bilancin në 31 mars, nuk u shty. Mosshtyrja e tij i ngarkon bizneset me detyrimin për të paguar tatim fitimin shtesë, në rast se fitimi i realizuar në 2019-n ishte më i lartë se ai i parashikuar.

Prilli pritet të jetë ndërkohë muaji i vështirë për biznesit, teksa do të duhet të paguhen taksat dhe tatimet e marsit, ku shumë subjekte nuk kanë pasur aktivitet, ose kanë pasur shumë pak, për shkak të kufizimeve për mospërhapjen e koronavirusit.

Në 14 prill është data e pagimit të TVSH-së. Në datën 20 është pagimi i sigurimeve shoqërore të punonjësve.

Po në datë 20 është afati për parapagimin e kësteve të tatim fitimit. Sipas një ndryshimi ligjor të viteve të fundit, bizneset mund ta paguajnë këstin e parapagimit të tatim fitimit çdo muaj (deri në 20 të muajt tjetër), ose një herë në tre muaj. Në rast se nuk e paguajnë të paktën një herë në tre muaj gjobiten me 10% të shumës së tre kësteve. 20 prilli është dhe afati kur tatimi i tremujorit të parë duhet parapaguar patjetër, përndryshe biznesi ngarkohet me gjobë. Për më tepër që parapagimi bëhet në bazë të bilanceve të viteve të mëparshme, kur fitimet, në kohë normale, kanë qenë më të larta.

Ndonëse është pohuar gojarisht nga kryeministri për heqje të kamatëvonesave, deri tani nuk ka asnjë vendim për heqjen e tyre ose të gjobave.

Lehtësi janë bërë vetëm për biznesin e vogël (deri në 14 milionë lekë), që mund të paguajë këstet e tatimfitimit për 6 mujorin e parë deri në fund të vitit, por gjithsesi për këstet e 6 mujorit të dytë nuk ka shtyrje, duke e shtyrë të gjithë barrën për në muajt e fundit të vitit.

Ministri i autorizuar për Covid-19, Arben Ahmetaj ka pohuar më herët në se mars të ardhurat në mars pritet të jenë 70 milionë euro më pak, ndërsa në prill efekti pritet dhe më i lartë, në 100 milionë euro./Monitor/