TCH apo Klan, kjo nuk është çështje e opozitës!
nga Agim Popoci
Në kulmin e krizës politike, kur Edi Rama u shprehë qartë se nuk pranon negociata me opozitën dhe ka shtuar terrorin policor ndaj eksponentëve dhe bizneseve demokrate, kur të gjithë pyesin pse Ilir Meta tallet me Partinë Demokratike dhe pse PD nuk u regjistrua për zgjedhjet e 13 Tetorit, ndër opozitarë katapultohet një çështje që nuk ka të bëjë as me Edi Ramën, as me Ilir Metën dhe as me fatin e opozitës: Alban Jaho dhe Klan-i u larguan nga Digitalb!
Ramiz Alia ishte armiku më i madh i PD, por me ikjen e tij asgjë nuk ndryshoi edhe pse nuk quhej as Ramiz dhe as PPSH. Sërish Partia Demokratike kishte armik madje shumë më të denjë se partinë kriminale të punës edhe pse quhej PSSH. Fatos Nano na u shfaq si armiku më i madh i PD dhe popullit shqiptar, por asgjë nuk ndryshoi kur fatos ishte Pandeli Majko, Ilir Meta dhe së fundi Edi Rama.
Gjithë ky strumbullarë politik shoqërohej me një fuqi të madhe mediatike, e cila dikur më sofistikuar por sot hapur del se nuk është asgjë më pak se një palë besnike e së majtës. Këtë e dëshmoi edhe tranzicioni shqiptar gjatë të cilit e majta shqiptare në pushtet dhe jo vetëm, financoi dhe prodhoi media ekstremisht të majta që pushtuan frekuencat kombëtare, dhe sot janë një kokëqarje politike shtesë për opozitën; E cila, tashmë mund të quhet pjesë e fajit, nuk i kushtoi rëndësi dhe nuk financoi as median e vetme që e kishte në shërbim, Shijak TV.
Por, socialistët, siç thoshte i ndjeri Pjetër Arbnori, specialistët, edhe me ardhjen në pushtet të PD, krijuan në psikozën shqiptare, një TCH që e kishin besnike dhe Klani-in që tradhtoi dhe u bë me Doktorin. Por kur Doktori iku në opozitë, gjithçka ndryshoi pranë opozitës, por jo edhe tek specialistët që vazhduan të kenë në shërbim po ato media që i kishin nga themelimi, ku përfshihet edhe Klan-i.
E demokratët si shqiptarë që shquhen me kujtesën e tyre të shkurtë, i lanë hapësirë në shpirtin e tyre edhe shqetësimit “Klan-i u përjashtua nga platforma Digitalb!”
Ndonëse ky është problem dhe halli i vetëm i televizionit Klan dhe atyre që pronarja e Top Media i largoi nga parajsa që kishin krijuar si menaxherë të Digitalb me paratë e huaja, ai papritmas u fut në debatin ndër opozitar duke u bërë çështje po aq madhore sa largimi i Edi Ramës, qeveria tranzitore dhe zgjedhjet e lira dhe të ndershme.
Strukturat e PD nuk u thirrën për të diskutuar këtë çështje por largimi i Alban Jahos dhe Klan-it nga Digitalb u bënë shqetësim demokratë i cili zuri vend edhe aty ku diskutoheshin strategjitë e ardhjes në pushtet dhe kritikat ndaj kreut demokrat në opozitarizmin e tij, pa e kuptuar se po shqetësohen dhe mbrojnë njërin ndër faktorët kryesor që PD sot është në opozitë!
Alban Jaho nuk mund të jetë kurrë çështje e Partisë e Demokratike dhe opozitës. Kur Partia Demokratike erdhi në pushtet, dhe u konstatua një evazion i frikshëm fiskal i Digitalb dhe flitej për 11 milionë euro që kjo platformë i kishte borxh arkës së shtetit, po, ky ishte momenti që të shqetësohet çdo demokrat dhe çdo shqiptar për Jahon dhe jahot që bëjnë biznes në mes të Tiranës dhe shesin mallin kudo ka shqiptarë në botë, dhe nuk paguajnë TVSH. Çështja u mbyllë në heshtje por ashtu siç u bë problem publik nuk u sqarua se si u mbyllë me Ridvan Boden apo të tjerët; Gjithsesi një gjë ishte e qartë, drejtor i “shkelësit” Digitalb ishte Alban Jaho, ky që sot na del hero i madh meqë përballë kishte Ben Blushin; Benin, që në atë kohë ishte në krah të Edi Ramës por nuk ishte pjesë e asaj bande deputetësh socialistë që mbronin paligjshmërinë duke u renditur në istikamin e Digitalbit, me udhëheqësin e tij, Alban Jaho.
Klan për dallim nga Alban Jaho në fillimet e pushtetit të PD, edhe pse kompani mediatike dhe jo drejtor i një kompanie, ishte një kafshatë shumë e vogël edhe pse i kishte bërë shumë ndere si Edi Ramës ashtu dhe Partisë Socialiste që ishte në pushtet.
Por, si Jaho ashtu dhe Sandri në shërbim të Edi Ramës dhe gjithë demokratët që frymonin në këtë vend, nuk e kanë çuar nëpër mend se Klan-i mund të zhvendoset në istikamin e tyre, madje të bëhet shumë më shumë se pjesë e pushtetit demokrat. Por ja që ndodhi, madje dhe vetë Edi Rama u bë sikur u mahnitë me këtë lëvizje dhe më vonë edhe pasurinë e frikshme, për të cilën me dënes shfrynte duke thënë “T’fala Sandrit”; Ndërsa TCH ngeli aty ku ishte, pa u josh nga pushteti demokrat!
Kur shërbimi i Klan-it nuk po mungonte ashtu si dhe shpërblimi i pushtetit demokrat, asnjëri prej eksponentëve të pushtetit të PD nuk e shikonte me xhelozi kapitalin e frikshëm në rritje të kësaj kompanie mediatike, sepse e konsideronte pjesë shpirtërore të saj.
Por, kur PD iku nga pushteti dhe papritmas lajmet që kishin të bëjnë me Partinë Demokratike transmetoheshin në edicionet e lajmeve të Klan-it pas çmimit të kastravecit, demokratët e kuptuan se kush ishte idioti në këtë mes.
Dhe, derisa Klan-i me (mos)veprimet e tij u largua shpirtërisht nga Partia Demokratike dhe u kthye te partia mëmë, demokratët ndër vite u pajtuan me “t’futmen e Sandrit” dhe vazhduan betejën e tyre opozitare pa i bërë t’fala.
Vjen dhe fillimgushti i nxehtë politikë dhe jo vetëm, kur demokratëve iu servir lajmi se ishte Ben Blushi “armiku i popullit, pse Jaho dhe Klan-i u larguan nga platforma Digitalb.
Largimi i Alban Jahos dhe Klan-it nga platforma e Digitalb mund të kenë arsye të forta biznesi, mund të jetë edhe thjeshtë qejfi i pronares Vjollca Hoxha, por në asnjë sekondë, ky nuk mund të jetë shqetësimi i opozitës. Digitalb, me ose pa Alban Jahon, me ose pa Klan-in, nuk kanë lidhje me opozitën, që të dy janë kundërshtar të denjë të Partisë Demokratike!
Në fund, Ben Blushi! Drejtori i TCH nuk është çështje emri por çështje prone. Ky është dhe problemi i opozitës! Kur ta kuptoj se çfarë është prona do ta ketë të qartë edhe linjën editoriale të TCH, dhe nuk ka pse acarohet me drejtor Benin, sepse sikur edhe Sandri të jetë drejtor, këtë punë do ta bënte shërbëtori i Vjollcës! Pa keqpërdorim të fjalës “shërbëtor” dhe pa teori konspirative! Thjeshtë, Drejtori nuk është pronar, është menaxher qoftë ky Albani, Beni…
Pra, Drejtori nuk mund të jetë fajtori në asnjë rast, ashtu siç nuk është shqetësim për opozitën në asnjë rast si Alban Jaho ashtu dhe Klan-i. Aq më pak kemi kur kemi të bëjmë me largimin e dy antidemokratëve të denjë…
