Të akuzuar për sulmin terrorist në Banjskë, shtyhet seanca fillestare

Seanca fillestare ndaj të akuzuarve për sulmin terrorist në Banjskë është shtyrë për 9 Tetor, pasi avokatët e të akuzuarve kërkuan më shumë kohë për të lexuar shkresën e lëndës dhe provat e Prokurorisë. 

Mbrojtësi i të akuzuarit Blagoje Spasojeviç, avokati Lubimir Pantoviç kërkuan ndërprerjen e seancës me arsyetimin se shkresat i ka pranuar në mënyrë elektronike dhe jo fizikisht. Ky deklarim i Pantoviçit u përkrah edhe nga dy avokatët tjerë të të akuzuarve Maksimoviç dhe Toliç.

Avokati i palës së dëmtuar, Arianit Koci, ka theksuar se kërkesa s’ka mbështetje ligjore sepse kanë mundur që ato shkresa t’i printojnë vetë.

Ndërsa, prokurori special Naim Abazi tha se ka qenë e pamundur që shkresat e lëndës të dorëzohen fizikisht, andaj i kanë dorëzuar në mënyrë elektronike.

Gjyqtari Hoti ka konsideruar se Prokuroria e ka përmbushur obligimin ligjor të dorëzimit të shkresave të lëndës, andaj kërkoi që të kalohet me leximin e aktakuzës.

Por, avokati Pantoviç ka kërkuar kërkoi sërish fjalën, duke thënë se shkresat i kanë pranuar në mënyrë elektronike të hënën pasdite dhe se nuk janë përgatitur për seancë pasi që aktakuza është voluminoze dhe se të mbrojturit e tyre nuk e dinë përmbajtjen e saj.

E prokurori Abazi tha se është e papranueshme kërkesa për shtyrje të shqyrtimit fillestare pasi që aktakuza dhe shkresat e lëndës janë dorëzuar dhe për këtë kanë dëshmi.

Por, Gjykata mori vendim dhe ndërpreu shqyrtimin fillestar, me qëllim që të akuzuarit të pajisen me akuzën dhe ta dinë përmbajtjen e saj, e më pas t’iu jepet e drejta për deklarim rreth fajësisë.

Nis gjykimi me vetë tre të akuzuar

Ndonëse Prokuroria konfirmoi se të pranishëm në seancën e sotme ishin vetëm tre të pandehur dhe kërkoi që të sigurohet prania e të gjithë të akuzuarve, ose që ata të gjykohen në mungesë, Gjykatësi Arben Hoti tha se ka kushte për shqyrtimin fillestar ndaj të pandehurve që gjenden në masën e paraburgimit për rastin Banjska: Dushan Maksimoviç, Vladimir Toliç dhe Blagoje Spasojeviç, të cilët janë paraqitur sot para trupit gjykues.

Ndërsa prokurori special, Naim Abazi, shtoi se pjesa tjetër e grupit terrorist nuk ka qenë e mundur të kapet për t’u sjellë në gjykatë, pavarësisht kësaj tha ai, mund të zhvillohet gjykimi në mungesë, Avokati i palës së dëmtuar, Arianit Koci, tha se nuk ka faktorë që gjykata të vendosë të mos mbahet gjykimi në mungesë.

“Siç po e shihni ky gjykim po mbahet në mungesë të 42 personave. Është specifik sepse ka vdekur polici Afrim Bunjaku dhe janë dëmtuar palët dhe të njëjtën kohë ka mundur të rrezikohet rendi kushtetues i Republikës së Kosovës. Gjykata duhet të vendos a të mbahet a jo, sidoqoftë duhet të merrni mendim edhe nga gjykata supreme”, ka thënë ai.

Gjykata po ashtu ka konstatuar që prokuroria e ka përmbushur obligimin për ofrimin e shkresës së lëndës palës së akuzuar, në mënyrë elektronike, edhe pse avokatët e të akuzuarve kërkuan që ato të dorëzohen në formë fizike. 

Pas konstatimit të gjykatës se Prokuroria ka kryer obligimin për dorëzim të shkresës së lëndës, Pantoviq, avokat i njërit prej të akuzuarve, ka bërë kërkesë që seanca të ndërpritet.

“Ftesën për seancë të sotme e kam pranuar të hënë pasdite. Të njëjtën ditë më është dorëzuar aktakuza dhe shkresat elektronike. Fizikisht nuk kemi pas mundësi që të njoftohemi me këtë aktakuzë voluminoze. Dhe tani kemi dëgjuar nga Prokuroria që janë me mijëra faqe. Unë nuk kam pasur mundësi që në një mënyrë adekuate me u konsultu me të mbrojturin tim dhe lidhur me çështjen e fajësisë që është sot n ërend dite. Të mbrojturit tim, aktakuza ende s’i është dorëzuar dhe nuk ka pasë mundësi ta dijë se për çka akuzohet,” tha Pantoviç duke stuar se lënda është komplekse, tha ai, me akuza të rënda dhe me dokumente e prova voluminoze.

“Më duhet kohë ta diskutoj me të, lidhur me çështjen e pranimi të fajësisë dhe nuk jam në gjendje që sot t’i ofroj mbrojtje të mbrojturit tim.”

Në seancën dëgjimore ishin dhe policët, Alban Rashiti e Çlirim Shaqiri si palë të dëmtuara të cilët ishin plagosur më 24 shtator 2023 nga një grup serbësh të armatosur.

Në sallë ishin prezentë edhe familjarët e të dyshuarve.

Ndryshe, në aktakuzë për sulmin terrorist në Banjskë ngarkohen 45 persona: Milan Radoiçiç, Blagoje Spasojeviç, Vladimir Toliç, Dushan Maksimoviç, Vladimir Radivojeviç, Uglesha Jarediç, Milorad Jevtiç, Vlastimir Andriç, Aleksandar Milosavleviç, Lazar Shmigiç, Velko Gjorgjeviç, Vladimir Vuçetiç, Stefan Jovanoviç, Milovan Krstoviç, Urosh Miliç, Trajko Vasiç, Danilo Vasiç, Vukashin Jarediç, Sasha Periç, Nemanja Stankoviç, Momçilo Vuçkoviç, Stefan Radojkoviç, Marjan Radojeviç, Marko Arsiç, Zharko Cvetkoviç, Krsto Damjanoviç, Stefan Milosavleviç, Marko Saviç, Aleksandar Jevremoviç, Radosh Gvozdiç, Ivan Miliç, Gojko Zubaç, Nemanja Radivojeviç, Radak Axhiç, Milosh Milenkoviç, Gjorgje Baloviç, Daniel Gjukiç, Danilo Virijeviç, Aleksandar Tanaskoviç, Milosh Kragoviç, Milan Nedelkoviç, Nikola Illiç, Vladan Iliç, RAD D.O.O. dhe Radule Steviç.