Të ardhurat e bankave nga komisionet arritën rekord të ri vitin e kaluar

Të ardhurat e bankave nga komisionet arritën një rekord të ri vitin e kaluar.

Të dhënat nga Banka e Shqipërisë tregojnë se të ardhurat e sektorit bankar nga zëri i komisioneve dhe gjobave kishin vlerën e 14.95 miliardë lekëve ose rreth 130 milionë eurove.

Vlera e të ardhurave nga komisionet është rritur me 11.9% krahasuar me një vit më parë. Të ardhurat nga komisionet përbëjnë edhe zërin e dytë më të rëndësishëm të të ardhurave të sektorit bankar, pas të ardhurave nga interesat.

Rritja e të ardhurave nga komisionet ka dhënë një kontribut pozitiv në përmirësimin e mëtejshëm të rezultatit financiar të sektorit bankar shqiptar. Fitimi neto, sipas standardeve të raportimit për Bankën e Shqipërisë, arriti në 21.68 miliardë lekë, në rritje me 0.2% krahasuar me një vit më parë.

Rritja e të ardhurave nga komisionet shpjegohet, në radhë të pare, me formalizimin e ekonomisë dhe përfshirjen më të madhe financiare, që reflektohet edhe rritjen e vazhdueshme të përdorimit të produkteve dhe shërbimeve bankare nga publiku. Statistikat e Bankës së Shqipërisë tregojnë se numri i përdoruesve të shërbimeve bankare është në rritje.

Vitin e kaluar, numri i llogarive në sektorin bankar arriti në 3.11 milionë dhe u rrit me 2% krahasuar me një vit më parë. Vlerësimet e Bankës së Shqipërisë tregojnë se tashmë afërsisht 70% e shqiptarëve në moshë madhore zotërojnë një llogari bankare.

Por, një pjesë e zgjerimit të të ardhurave mund t’i atribuohet edhe rritjes së nivelit të komisioneve nga bankat tregtare. Në vitet e fundit, ka pasur një tendencë për rritje të komisioneve fikse, kryesisht të atyre të lidhura me mirëmbajtjen e llogarive.

Rritja e komisioneve, ndër të tjera, mund të shpjegohet edhe me rritjen e kostove rregullatore, sidomos pas vitit 2019. Rritja e shpenzimeve të shqiptarëve për komisione mund të jetë një shembull i prekshëm i faturës që po sjell shtrëngimi i vazhdueshëm i kuadrit rregullator të sektorit bankar.

Për vitin 2021, bankat paguan prime të sigurimit të depozitave në vlerën e 3.76 miliardë lekëve ose 29 milionë eurove. Këtyre iu shtohen edhe 664 milionë lekë për Fondin e Ndërhyrjes së Jashtëzakonshme, që e çojnë shpenzimin vjetor për të dy fondet në 4.4 miliardë lekë ose gati 37 milionë euro.

Ligji “Për ndërhyrjen e jashtëzakonshme në banka” parashikon që brenda vitit 2027 ASD duhet të ketë krijuar një fond të ndërhyrjes së jashtëzakonshme sa 0.5% e detyrimeve të sektorit bankar. Duke qenë se detyrimet dhe kryesisht depozitat kanë ardhur në rritje të shpejtë në vitet e fundit, rrjedhimisht edhe kontributi vjetor i bankave është rritur.

Nga ana tjetër, shtesat markoprudenciale të kapitalit i shtohen kërkesave rregullatore bazë të kapitalizimit të bankave, që përcaktohen në rregulloren “Për mjaftueshmërinë e kapitalit”.

Duke filluar nga data 1 janar 2023, bankat kanë përmbushur nivelin e ri të shtesës konservuese të kapitalit, që ka arritur në 2%. Nga 12% që është kufiri minimal i mjaftueshmërisë së kapitalit, me shtesën konservuese prej 2% ky kufi ka arritur në 14%.

Shtesa konservuese do të rritet sërish me 0.5% nga 1 janari 2024. Por, kërkesat e kapitalizimit janë edhe më të larta për një grup të veçantë bankash, të klasifikuara me rëndësi sistemike./Monitor/